SIBU: Siku pengajar ba sebuah sekula sekondari peribit rugi RM60,000 pengudah ditipu nengah on-line tauka dikumbai Macau Scam.

Ketuai Polis Pelilih Sibu ACP Stanley Jonathan Ringgit madah, pengajar tu beumur 45 taun udah nerima kangau urung 11.20 pagi kemari ari siku lelaki ti madahka diri ari sebuah serikat telefon.

Lelaki nya madahka pengajar tu broadband iya dikena lelaki bukai bejudi.

“Kesal ati enggau irau, pengajar nya ngiarka pekara nya.

“Pengudah ngiarka pekara nya, kangau nya dipindah ngagai ACP Poh Han Siong ari Bukit Aman ti ngasuh iya mindahka duit iya ngagai lumur akaun bank ti disediaka saspek ngambi ngemendarka Bukit Aman mansik pekara nya,” ku iya ba sebengkah penerang, ditu kemari.

Stanley madah, pengajar nya nitihka jaku lalu iya ngeluarka semua duit simpan ari sebuah bank ditu.

“Udah nya, iya masukka duit RM60,000 dalam dua akaun bak nengah enam transaksyen ba hari ti sama,” tandu iya.

“Pengajar nya semina sedarka iya ditipu lebuh kangau nya putus enggau lumur iya disekat saspek.

“Kes tu dipansik nitihka Seksyen 420 Kanun Keseksaan,” ku iya nerang.