KUCHING: Penganjung nama enggau penyukung chalun ti deka bediri minta pilih ba Pengawa Bepilih Besai (PRU) Sarawak Ke-13 tu ila meseti nyadi pengundi rejister ba sitak ti diperebutka nya.
Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar madahka keretas ngantung nama chalun deka ditulak enti nama penganjung nama enggau penyukung tu nadai dalam rintai nama pengundi sitak nya.
“Penganjung nama enggau penyukung enda tau enda nyadi pengundi rejister ba sitak ti diperebutka chalun, iya nya sitak ke alai nama sida dirintai dalam rintai nama pengundi.
“Enti nama sida nadai dalam rintai nama pengundi sitak nya, sida enda ulih nyadi penganjung nama tauka penyukung chalun ti disukung,” ku iya. Asfia bejaku munyi nya rambau aum pemberita khas ba Bilik Media DUN Sarawak ditu, kemari.
Nangkan nya, lebuh ditanya penemu iya nyema dichalun nyadi chalun ba PRU Sarawak Ke-13, Asfia madahka iya endang nyikap diri tang pekara nya bepanggai ba pemutus parti ti diarika iya.
“Taja pia, undang-undang di Sarawak ngemendarka siku ti nyadi Speaker DUN nya enda ibuh nyadi Kaban Kunsil Nengeri (ADUN).
“Nya alai, kitai bisi undang-undang ti ngenukuka siku speaker enda ibuh nyadi chalun di Sarawak,” ku iya.
Dulu ari nya, Premier Sarawak, Datuk Patinggi Tan Sri Abang Johari Tun Openg ba sebengkah aum pemberita madahka DUN Sarawak padam kena 26 Oktober 2026 (Hari Satu) dikena meri peluang ngagai PRU Sarawak Ke-13.
