KUCHING: Langgur nempa mengeri pintar ti ngemeranka pemeruan, ngena teknologi moden sereta sistem pengangkut mensia mayuh ke engkeman beguna dikena nentuka Kuching majak nyadi mengeri ti beresi, likun sereta lantang alai diau dudi hari.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemansang mengeri mesti dilanggur ukai semina dikena nipak guna maya hari tang bela ngira penguji enggau penanggul dalam kandang 30 taun ke deka datai.
“Iya ke beguna iya nya mengeri tu mesti bisi identiti iya empu, lebih agi baka pekara bekaul pemeresi enggau perengka guna ke chukup.
“Nya alai, Perintah Sarawak ngemeratka pekara bekaul baka ni sesebengkah mengeri nya dikemansangka. Sehari tu, nyangka mengeri nya agi likun tang kitai enda nemu nama ke deka nyadi 30 taun tu ila,” pia ku iya.
Iya bejaku munyi nya maya Sarawak Urban Forum (SUF) 2.0 di Hikmah Exchange Event Centre (HEEC) ditu, Hari Satu.
Kelimpah ari nya, Datuk Patinggi Abang Zohari madah, Sarawak agi bisi awak alai numbuh pemansang ti patut dikena enggau chara berurun nyengkaum numbuh genturung pendiau ti disukung sistem pengangkut ke engkeman.
Iya madah, pemayuh perengka pengangkut baka di Samarahan, Batu Kawa, Bau enggau Siburan mandangka pemesai guna nyendiaka perengka guna pengangkut mensia mayuh ti efisyen agi ke ulih nengah genturung pendiau ngelawa mengeri.
“Ketegal nya, kitai benung nambahka perengka guna sereta numbuh sistem pengangkut mensia mayuh pintar baka Autonomous Rapid Transit (ART).
“Ngena ART, sistem pengangkut deka likun agi. Baka ke dipadah ngagai aku, ART ulih datai ba tiap bengkah stesyen dalam kandang 15 minit aja,” ku iya nerang.
Bela datai maya nya, Sapit Premier Sarawak Datuk Amar Prof Dr Sim Kui Hian, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Sapit Menteri Ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Industri Pemakai, Komoditi enggau Pemansang kandang Menua Sarawak Datuk Martin Ben, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali sereta pemesai ke bukai. — EDISI UKAS
