KUCHING: Sarawak bisi pengulih nerima penyampau meranakka puku manggai USD50 bilion tauka urung RM204.29 bilion ari kompeni teknologi antarabansa tebilang, lebih agi ba teknologi palan data pintar.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, langgur nya benung diperundingka tang nama kompeni ke bekaul empai ulih dipadah naka ke diatu.
Ku iya, pekara nya enda dipadahka iya tang diterangka Menteri Besai Dato Seri Anwar Ibrahim empai lama tu tadi sepengudah betanya ngagai iya pengamat penatai pemeranak puku nya ke Sarawak.
“Nama ke dipadah Menteri Besai nya enda amat tang agi benung dilanggur, endang bisi langgur deka meranakka puku bekaul palan data pintar.
“Penyampau iya, kitai enda ulih madahka nama pemeranak puku dulu laban tu bekaul enggau kompeni antarabansa tebilang, nangi ke tau nanggul stok sida.
Nya alai, aku enggai madah sapa bagi kompeni nya tang endang sigi bisi,” pia ku iya.
Iya madahka pekara nya maya dirandau media sepengudah bejadika Sarawak Urban Forum (SUF) 2.0 di Hikmah Exchange Event Centre (HEEC), ditu, Hari Satu.
Iya mega nerang, pengawa meranakka puku nya nyangka deka digaga di Tanjung Embang.
Dulu ari nya, maya bejaku ba mua bala mayuh Datuk Patinggi Abang Zohari madah, penatai kompeni teknologi tebilang dunya nya mandangka pengandal pemeranak puku ngagai kuing tuju pemansang Sarawak sereta pengeransing nengeri tu ngemansangka ekonomi baru.
Iya madah, Sarawak benung ngalih ngagai ekonomi baru ti ngemeratka pemansang modal mensia dikena nangkup guna industri teknologi moden.
Ku iya, pemutus nyendiaka pelajar tinggi pechuma ungkup anak Sarawak bela nyadi batang kebuah numbuh pengandal pemeranak puku.
“Kompeni teknologi tebilang dunya datai ke Kuching.
Nama kebuah?
Laban sida meda kitai ngembuan timpai penemu jauh ke mua.
Sarawak benung nyingkang ngagai ekonomi baru, kelimpah bela nyendiaka modal mensia.
“Kitai meri pelajar tinggi pechuma ngagai sida.
Nya alai pemeranak puku tekait ati laban nemu sida deka bisi orang gawa ti ulih gawa enggau sida,” ku iya madah baru. — EDISI UKAS
