Pengasih indai ke anak nadai banding

Tanggungpengawa Gisella Anastasia majak besai pengudah nyadi indai tunggal kelebih agi nyaga enggau nyeridi anak indu iya ti benung mekang umur.

Anak dikesayau, Gempita begunaka perati kelebih agi maya bisi atur program di sekula lalu Gisella ngelimpangka awak diri nyempulang anak iya nya.

Kesemua timpai kenang pait manis seduai menyanak suah dikunsi Gisella nengah gambar ti dibantai ba akaun Instagram iya.

Laban diau jauh di menua pesisir, Gisella nadai ngira pengiruh enggau pengelelak diri beranjungka anak lalu semua tu nyadika peransang iya nyendia rampa idup ti meruan agi ungkup seduai menyanak.

“Berasai chukup lelak sereta ngantuk laban enda ulih meli tikit bilun pemadu tumu ari Medan ke Jakarta,” ku iya.

PENYAYAU… Gisella naka ulih magi jam diri limpang ngulu program anak indu iya, Gempita.

Gisella meda tekenyit lebuh meda atur program anak indu iya nyauka semak enggau atur kereja iya di menua pesisir.

Nya ti ngasuh ex-bini Gading Marten tu enda chukup jam endur belelak sereta belepa.

Ku iya, endang ari pun program anak iya di sekula suah amat berubah baka hari bulan diinsur tumu agi lalu Gisella ngatur jam baru nangika berebak.

“Tang bai pengasih indai ke anak, seagi kitai ulih ngereja iya endang nadai pedulika pekara bukai,” ku iya nerang.

Gisella enggau Gempita bela ngerasuk pekayan asal bansa Dayak ti dipeda manding amat.

MURIH… Pemajik Gempita murihka indai iya, Gisella.

Ulah Gisella ti beratka anak patut nyadi chunto kitai lalu status indai tunggal ukai ke dalih puntan nyeridi anak nyadi orang menyana dudi hari.

Pekara tu tau sereta patut diperunding bala indai tunggal di menua tu laban kitai meda pengasih Gisella ngagai anak iya ngelui ari pekara bukai.

Ukai reti kitai kelalu ngasika anak tang kitai dekaka sida besai dalam rampa ti meruan, bisi pengasih enggau diajar bebasaka bala bukai laban tu deka nempa ulah sida.

Ari lansa kenang sebagi ari pengidup Gisella enggau Gempita tu kitai mega belajar ke siti pekara ti beguna amat iya nya pengelantang anak bepanggai ba indai sida taja kemaya hari tebal agi bala indai bisi batang kereja sereta pemintar runding magi jam diri.

Suara Sarawak