Pengawa lumba nyamin pengerai

BUKIT GORAM: Pengawa lumba endang patut dikemeran tiap iku kitai laban ulih nyamin pengerai, ku Adun Bukit Goram, Jefferson Jamit Unyat.

Iya mansutka penerang tu lebuh bejadika Saberkas Run 2019 ke diatur ba Stadium Tertutup Bleteh ditu, ensana.

“Pengawa bejalai kaki enggau belanda udah nyadi daya idup mensia mayuh kemaya hari tu dikena nyaga pengerai diri.”

“Nya alai perintah chukup ngemeranka pengawa lumba ambika kitai bulih penguntung ari pengawa ti ulih mansut ke peluh.”

“Pengawa lumba mega ulih ngurangka penyakit obesiti ba tiap mensia mayuh lalu ngelaban igi penyakit ke muntang ngemedis kitai,”ku iya

MANAHKA PENGERAI…Jamit ngelepas ke penyereta enggau ngulu lumba Saberkas Run 2019 ke diatur ba Stadium Tetutup Bleteh, ditu.

Jamit ngelalau genap gerempung tauka gempung ke aktif patut lebih chakah agi ngatur pengawa bekaul enggau lumba.

Program tu tadi ke berambaika jaku ‘Fit Malaysia @ Community’ tu udah mujur narit penyereta nyengkaum raban nembiak sekula enggau mensia mayuh.

Tu nyengkaum tiga buah sekula sekondari ari SMK Selirik, SMK Kapit enggau SMK Kapit 2 sereta empat buah sekula primari iya nya SKKampung Baru , SK Kapit, SK Methodist enggau SJK Hock Lam.

Lumba tu nyengkaum enam kategori Lumba Indu enggau Laki Tebuka, Lumba Indu enggau Laki baruh 18 taun enggau Lumba Indu enggau Laki baruh 12 taun.

Maya tu tadi, Jamit udah ngelepaska penyereta ke enggau ngulu program tu sereta meri perais ngagai sida ke menang.

Suara Sarawak