KUCHING: Komiti Penyangga Penusah Ngenyit Nengeri Sarawak (JPBNS) sekali agi ngemansutka tangkan enda ngemendarka pengawa ngabang ngagai bilik ke bilik dalam rumah panjai tauka ngagai rumah panjai bukai nyerumba pengerami Gawai Dayak ti deka datai.
Chairman JPBNS Datuk Amar Douglas Uggah Embas sebedau tu mega udah madah pengawa ngabang Hari Raya enggau Gawai semina diintu sehari aja lalu enda tau dirami ngelui ari 20 iku pengabang seriris enggau atur ke udah ditetapka Perintah Besai.
Berebak enggau nya, bala nembiak Palan Pelajar Tinggi (IPT) ke mulaika diri ngagai menua diri empu apin lama dipinta nganjung diri beperesa pengerai ba palan pengerai pelilih menua diri empu.
Sekretariat JPBNS nengah siti penerang madahka tu kelebih agi ngagai sida ke apin beperesa pengerai Covid-19 lalu sida deka dikangau piak Komiti Penyangga Penusah Ngenyit Bagi Menua (JPBB) diri empu.
Kelimpah ari nya, JPBNS madahka bala nembiak ke dikuarantin di rumah ngambika seruran diau ba rumah aja lalu enda dikemendarka pansut.
Enti sida ditemu bejalai ba endur mensia mayuh, sida ulih diukum raban penerit adat di baruh Protection of Public Health Ordinance 1999 : Protection of Public Health (Measure on the Carrying out of Activities in Infected Local Areas) (No. 2) Order, 2020 ti dipansut kenaka 13 Mei.
Nitihka Seksyen 15 (3), genap iku meseti nitihka atur ke udah ditetapka opis menteri ngambika ulih matau pejalai iya dalam nengeri.
Atur nya ngengkaum pengawa ngena tag elektronik sereta ke bukai ti udah dipansutka JPBNS enggau pemendar ari opis menteri.
Nangkan nya, JPBB enggau Opis Menteri Pengerai (KKM) deka nambahka pengawa ngiga kaul semak ngambika sida ulih nyidi enggau jampat kaul semak ngagai kes positif ke baru.
