BAU: Berita sebubu ngapa pasal perambu nukar nama Kunsil Nengeri (DUN) Tasik Biru ngagai Singai enda ulih diputus parti politik laban pekara nya di baruh kuasa Komiti Besai Pengawa Bepilih Malaysia (SPR).

Sapit Presiden Parti Demokratik Progresif (PDP), Datuk Henry Harry Jinep madah, sebarang perambu bekaul nama sitak nya suah digaga ba pengawa ngaga baru adan menua nengah SPR, taja pia parti politik nadai kuasa nentuka ubah nya.

“Kami ti nyadi parti politik nadai pemutus ba pekara tu,” ku iya.

Henry bejaku munyi nya lebuh ditanya pemberita pengudah nyadi chairman Aum Tiga Taun Sekali Sitak Tasik Biru ba Balai Suarah Bau ditu, tadi.

Nerang silik, iya madah ke sebarang ubah nama sesebengkah kandang endur suah agi nyadi pelasar ngagai atur ba pengawa ngaga garis entara menua.

Ku iya, pengawa nukar nama kandang endur bepilih ukai pekara ti baru laban nya udah kala nyadi sebedau tu.

“Ambi ke chunto, ba sitak Bau, sebedau tu nyengkaum Bengoh tang dikalih nyadi Serembu lalu sebagi ari endur nya dibagi ngagai sitak Puncak Borneo.

“Pekara baka tu endang bisi nyadi sebarang maya lalu kami ngelempaika semua pekara tu ngagai SPR nentuka nya,” ku iya.

Iya ti mega Sapit Menteri Pengangkut madah, PDP agi nganti pemutus penuh bekaul perambu nambah penyampau sitak DUN ba pengawa magi sitak sebedau Pengawa Bepilih Besai Nengeri (PRN) Sarawak ti deka datai.

“Proses bekaul enggau penambah 17 sitak DUN baru agi nganti pemendar ari parlimen. Nya alai diatu kami enda ulih nyebut utai bukai…nganti dulu,” ku iya.

Ku iya, isu magi penuduk enda ulih diputus siku aja laban nya mungkur pemutus parti sereta mega konsensus dalam Gempung Parti Sarawak (GPS).

“Aku enda ulih ngaga pemutus nya kediri. Pekara tu patut dibai ngagai parti lalu dikerandau dalam Kaunsil Supreme Parti.

“Suah agi, enti PDP dipilih, pemutus kepenudi agi patut digaga ba konsensus GPS enggau randau entara raban tuai parti,” ku iya.