KUCHING: Perambu numbuh Media Club House ti deka nyadi palan begempuru enggau beinteraksyen raban media di Sarawak benung ditungkap.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, nya dikena nyendia fasiliti meruan ngagai bala pengemeran media.

Iya madah, pengawa numbuh palan nya beguna amat ngambi raban nya ulih bekunsi buah runding sereta belelak pengudah kiruh bejalaika pangku pengawa ninting hari.

“Media Club House tu deka nyadi palan bala pengemeran media begempuru, belelak, bekunsi buah runding enggau besilih not.

“Kebuah pia laban dalam nya deka disikap ngena ruang belelak, kafe mit, mija pool, main dart enggau fasiliti bukai ungkup tuju sosial.

“Bilik mandi mega deka disedia ngambi bisi diguna raban nya pengudah bejalaika pangku pengawa kelebih agi sida ti terus ngulu program ba endur bukai muak ke siang hari.

“Palan tu nyendia peluang ngagai sida betemu enggau bala bakih sama gawa, besilih buah penemu sereta ngedut kaul enggau raban media lalu aku ngasai ke tu siti buah runding ti nemban,” ku iya.

Abdullah mansutka jaku rambau Program Ngaku Komiti Besai Serimbai Hari Pemberita Nasional (HAWANA) 2025 sereta Aum Media Sarawak (SMeC) 2025 ditu, malam tadi.

Tampung iya, entara sadang penemu ti bisi diterima iya nya ngemansang palan rekreasyen semak Media Club House tu ila.

“Engka kitai ulih ngiga belanja bukai kelimpah ari belanja diberi perintah, ambi ke chunto, ngulihka belanja ari sekeda Serikat Diempu Perintah (GLC) dikena ngetan fasiliti tu.

“Kitai mega ulih beratika pengawa nyendia palan tambah iya nya gelanggang pickleball tauka padang mit ungkup bejalaika aktiviti lumba.

“Nangkan nya, kitai engka ulih nyendia gim mit ti disikap ngena fasiliti baka treadmill ungkup bejalaika pengawa sesais,” ku iya. – EDISI UKAS