SIBU: Pengawa nyaga pemeresi rampa menua enggau nyaga fasiliti mensia mayuh tanggungpengawa begulai lalu ukai pangku pengawa raban bekuasa aja.
Nya alai, peranak di genturung Bukit Igu dilalau ngesan pangku pengawa aktif matau pemeresi ba genturung pendiau sida.
Pekara nya dibantai Chairman Komiti Tetap Pengerai Mensia Mayuh enggau Rampa Menua, Kaunsil Pelilih Menua Pesisir Sibu (MDLBS), Kaunsilor Kevin Lau Kor Jie rambau ngulu Program Beripai Pengeleda Pemeresi ti diatur Komiti Pemansang enggau Pengelikun Genturung Pendiau (JKKK) Bukit Igu ditu, kemari.
Iya nyemetak madah, inisiatif nyaga pemeresi ukai semina meresi genturung pendiau diri empu aja tang nya ngaul pengawa nyaga fasiliti mensia mayuh baka tong uras, parit enggau jalai ti suah dipenyati raban ti nadai tanggungpengawa.
“Kitai semua bela ngesan pangku pengawa diri empu lalu ukai semina meresi aja tang matau.
“Enti bisi tong uras jai tauka lenyau, ripot pekara nya. Enti bisi meda orang ngereja pengawa nyeleti fasiliti mensia mayuh, rara sida tauka padah ngagai raban bekuasa lokal,” ku iya nyemetak.
Program beripai nya diatur dikena nentu pemeresi jalai berengkah ari Jalai Kwong Ming ngagai Jalai Ting Sing.
Kaban JKKK Bukit Igu bela bekerejasama meresi rumput ba sepanjai jalai nya nyentuk ngagai simpang dikena nentu nadai babas tauka rumput ngelindung jalai dia sereta ulih ngeruga pengelikun penguna jalai alun.
Kevin Lau madah ke diri temegah meda sukung enggau kerejasama tegut peranak dia enggau kaban JKKK Bukit Igu ngemujur program nya.
Ku iya, nya mandang tikas pengeleda komuniti ngagai pemeresi enggau pengelantang komuniti lokal.
