Pengawa seni terus dikemansang

KUCHING: Perintah Sarawak endang chakah dalam ngemansang seni main asal baka teater, drama enggau filem.

Menteri Nembiak enggau Lumba Datuk Abdul Karim Rahman Hamzah madahka dalam pekara tu opis menteri iya ngeluarka mayuh belanja dikena negika seni main asal ditu.

“Apin lama opis menteri aku ngemendarka dua bengkah produksi ngaga filem ditu iya nya ‘Sumpahan Jerunei’ ke alai perintah melanja penuh filem tu enggau filem ari Hollywood ‘The Rajah’.

“Pia mega, kitai udah ngeletakka Dun lama nyadi palan seni endur bala peneleba ba industri tu mantaika penau sida ti tau narit ati,” ku iya.

Abdul Karim bejaku munyi nya lebuh bejadi Drama Festival Kuala Lumpur (DFKL) versi Sarawak di Panggung Experimen Fakulti Seni Gunaan dan Kreatif (FSGK) ba Unimas ditu, kemari.

Kelimpah ari nya, iya andalka bala nembiak ti belajar di FSGK tau ngena peluang ti dibuka perintah dalam ngemansangka penau enggau peneleba sida ba industri seni main asal Sarawak.

“DFKL tu sebagi ari pelasar bekunsika penemu ari sida ti ngembuan peneleba ba industri tu baka sida ari Media Prima Berhad, penerbit enggau pelakun Erma Fatimah, Alfie Palermo serta pelakun tebilang baka Nazim Othman, Sheila Rusly enggau Ayda Jebat.

“Enggau tu aku andalka bala nembiak ari fakulti tu ngambi penemu sereta peluang belajar lalu ngangkatka seni main asal di menua tu ngagai tikas ti tinggi agi,” ku iya.

Kelimpah ari nya, iya ngarapka bala nembiak ti belajar di Sarawak ba industri tu ukai semina maju ba menua bukai tang ulih maju di Sarawak empu.

“Aku ngarapka menua kitai terus nerima sukung ba program-program bekaul enggau seni enggau main asal kelebih agi meri peluang ngagai nembiak baru di Sarawak ti datai ari pupu raban bansa.

“Aku mega berasai gaga meda kerejasama ngatur DFKL entara Media Prima Berhad, Unimas enggau Perbadanan Kemajuan Filem Nasional Malaysia (Finas) dalam ngiri penemu ngagai bala nembiak di menua tu,”ku iya.

Sama bisi datai Chirman Kumpulan Media Prima Berhad Datuk Syed Hussian Aljunid, Pengari Mandal Canselor Unimas iya nya Dekan FSGK Prof Madya Dr Musdi Haji Shanat enggau bala bukai.