KUALA LUMPUR: Opis Menteri Penyaga Menua (MINDEF) seruran ngenati pengelantang raban veteran Raban Soldadu Malaysia (ATM) bepinchin enggau enda bepinchin kelebih agi ti di baruh tikas penyeranta enggau nyendiaka bemacham inisiatif mantu raban nya.
Ku Sapit Menteri Penyaga Menua, Adly Zahari, tu nyengkaum bantu ngidupka diri nengah Opis Pekara Veteran Raban Soldadu Malaysia (JHEV ATM) RM300 sebulan lalu naka diatu 18,786 iku udah bulih pemaik mungkur belanja RM67.6 juta.
“Bisi mega disedia bantu khairat enggau raban iya nya RM3,000 ngagai veteran enggau RM1,500 ngagai ruang bilik ke alai naka diatu RM455,000 dikena,” ku iya lebuh nyaut tanya di Dewan Rakyat.
Adly mansutka jaku nya nyaut tanya R. Yuneswaran (PH-Segamat) deka nemu chara nyaga pengelantang raban soldadu veteran ti benung dipejalai sekali ke bepinchin tauka enda bepinchin seraris enggau pengawa nyerenih baru nengah Skim Servis enggau Pinchin Menua.
Adly madah, opis menteri mega nyendiaka agih belanja RM103 juta ungkup pengawa berubat, meli ubat sereta kereban berubat ngagai raban veteran.
Ku iya, tiga inisiatif bekaul rumah veteran mega dipejalai baka nirika 40 buah rumah, 170 buah rumah diseleti enggau inisiatif Siku Soldadu Sebuah Rumah (SASaR).
Nangkan nya, Adly madah, opis menteri merambu nentuka genap nengeri bisi komiti ba renggat JHEV dikena nangkup peminta lebih 213,000 veteran naka diatu.
“Kitai endang nemu staf ba JHEV mimit beratika semua soldadu veteran tu, nya kebuah kitai merambu nentuka ba genap nengeri nadai agi komiti begulai baka entara Melaka enggau Negeri Sembilan sereta Kelantan enggau Terengganu.
“Enti ulih ba genap nengeri nya bisi komiti ngintu pengelantang JHEV… tu meh pekara benung dipejalai kami,” ku iya nyemetak.
Ungkup tuju nya, ku iya, opis menteri mega deka nambahka staf nengah program MySTEP kelimpah deka ngaul soldadu veteran enggau gerempung veteran.
Adly mansutka jaku nya lebuh nyaut tanya tambah Datuk Khlir Mohd Nor (PN-Ketereh) pasal perambu opis menteri nambahka staf JHEV ba renggat nengeri. – BERNAMA
