KANOWIT: Kerajaan Gabungan Parti Sarawak (GPS) seruran ngintu nasit rayat, ku Adun Machan Allan Siden Gramong.

Ku iya, rayat di nengeri tu anang berasai nangi laban GPS seruran ngemeratka peminta enggau peneka rayat renggat baruh.

“Anang mendingka jaku selebubu ngapa ti semina deka bejaika nama Perintah GPS enggau enda beratika pengawa udah dikereja sida.

“Kami (pengari rayat) dalam GPS endang seruran ngemeratka pengelantang rayat sereta bejalai gawa ngagai renggat baruh nadai ngira pekara ke nyadi, baka ti udah dipinta Kepala Menteri Datuk Patinggi Abang Johari Tun Abang Openg,” ku iya.

Iya mansutka jaku tu lebuh bejaku ba mua mayuh rambau Program Pemesai Begulai Enggau Rayat di Rumah Petay, Nanga Sepituh, Ulu Machan ditu, kemari.

KEMERAH… Allan (duduk, empat kanan) berandau enggau peranak Rumah Petay di Ulu Machan rambau atur Program Pemesai Begulai Enggau Rayat, ensanus.

Program randau seraya belepa nya dikena Allan ngusung rayat di renggat baru sereta ngabas peranak rumah panjai ti benung berumah baru diatu.

Nya kebuah ku Allan, iya udah ngagihka geran dikena nyaup peranak di ngemujurka pengawa sida berumah baru ngambika jampat tembu.

Berebak enggau nya, Allan dekaka rayat di kandang menua nya liat ati nganti diri ngasaika pengelantang ari projek dipejalai di baruh GPS ti deka datai enda lama agi.

Kenu ku iya, projek tu enda ulih tembu tekala nya tang begunaka timpuh laban ngaul ungkus ti dikemendarka perintah.

“Aku minta semua kita sabar nganti laban sebuah jematan deka digaga di Ulu Machan ditu dalam taun tu di baruh projek Ejensi Pemansang Hulu Rajang (URDA).

“Hari bulan kepenudi tindu jematan kena 29 April tu tadi ke alai iya deka digaga enda lama agi.

“Nya alai kita ke diau ditu ila badu agi ngena jalai sungai tang deka disambung ngena jalai darat lalu mayuh pemansang bukai mega deka datai,” ku iya madah nyemetak.

Pengawa ngaga jematan tu ku iya nyata ngayanka penyiru GPS ngagai rayat di kandang menua pesisir ti seruran dikemerat.

Dulu ari nya, Tuai Rumah Petay bisi minta bantu ngelempungka tating penusah sida ngemai ramu berumah baka ngangkut batu bata, kerangan enggau batu.

Kebuah pia ku iya, semina perau aja dikena sida berangkutka ramu berumah ti begunaka timpuh sejam pejalai pengelama ari pasar Machan tauka Kanowit.

MASA TEMUAI… Penatai Allan (tengah) diambat peranak Rumah Petay, Nanga Sepituh di Ulu Machan rambau pejalai ngabas seraya ngulu Program Pemesai Begulai Enggau Rayat, ditu ensanus.