KUCHING: Pengelikun data nyadi pekara ti dikemerat ba Pelasar Infrastruktur Pemintar Digaga Pesaka Sarawak ti ngempung data enggau penerang bekaul perintah ba siti pelasar aja dikena nyukung perambu enggau pemansang nengeri. Premier Sarawak, Datuk Patinggi Tan Sri Abang Johari Tun Openg madah, pelasar nya ngemendarka data perintah dikena ba mayuh bengkah tuju nyengkaum merambu pemansang mengeri pintar.
“Taja pia, ukai semua data ulih dikunsi laban bisi bida entara data strategik ti ulih dikunsi enggau data ti patut dijaga ketegal pekara pengelikun.
“Ditu mih pangku pengawa Sarawak Information System Sdn Bhd (SAINS) meda bida nya, nama ti tau dikunsi enggau nama ti enda tau dikunsi, kelebih agi ari sukut pengelikun,” ku iya.
Abang Johari bejaku munyi nya ngagai pemberita pengudah ngelancharka Pelasar Infrastruktur Pemintar Digaga Pesaka Sarawak di sebuah hotel ditu, ensana.
Ku iya, data ti ulih dikunsi ulih dikena ungkup tuju perambu enggau pemansang, nyengkaum mantu rayat ngulihka penerang ti bekaul ba kandang endur ti engkeman mungkur sektor betanam betupi enggau industri.
“Data ba kandang endur ti udah ditetap ungkup pengawa betanam betupi enggau bemacham palan industri ulih diambi nengah pelasar nya sereta enda ibuh ngulihka penerang kediri ari bemacham penerang bukai.
“Ambi ke chunto, penerang bekaul enggau Taman BioBioteknologi ti benung dikemansangka di Samarahan ulih diambi nengah pelasar nya. “Fasiliti tu mega dibuka ngagai raban luar, nyengkaum pemeranak puku ti deka numbuhka dagang kunsi dikena ngemansangka palan ngaga barang ti bekaul enggau biodiversiti.
“Enti nya dagang kunsi, sida semina ‘log in’ ngagai pelasar kitai tu, kitai ulih mandangka dini endur nya, berapa pemesai palan nya enggau nama kereban ti bisi dalam data nya,” ku iya.
Abang Johari madah, chara nya ngemendarka proses merambu enggau peminta dirumban laban penerang ti diguna bisi ba siti pelasar, kelimpah ngurangka penanggul ti bekaul ngiga penerang ari mayuh bengkah ejensi perintah.
Ku iya, pengulih ngatur sereta ngena data enggau pintar beguna dikena ngemuntangka Sarawak ngerumpan chara ngiga jalai mutarka penanggul, perambu pemansang enggau pengawa ngemansangka mengeri pintar nengah pelasar tu.
