Pengelikun, pemeresi enggau pengelantang dikemerat

KUCHING: Dewan Bandaraya Kuching Utara (DBKU) deka beratika dulu pematut pengawa masang CCTV tauka kamera trafik ba Medan Niaga Satok.

Datuk Bandar DBKU Datuk Junaidi Reduan madah pengawa meri CCTV ba palan bejual nya deka diperundingka enggau manah laban nya siti ari chara ngurangka pengawa salah nyadi ba endur nya.

“Pengawa numbuhka CCTV begunaka ungkus sereta servis ti besai.

“Taja pia, Perintah Sarawak udah ngepunka pengawa numbuhka CCTV ba selampur mengeri tu, nya alai kami mega deka berundingka perambu nya ngambika ulih dipejalaika ba ditu,” ku iya.

Junaidi madah munyi nya lebuh dirandau pemberita pengudah pengawa bejalai ngelingi Medan Niaga Satok ditu, kemari.

BEJALAIKA PENGAWA… Junaidi (tengah) berandau enggau siku pedaja ba Medan Niaga Satok bekaul enggau pejalai dagang iya ba endur nya.

Nangkan nya, iya madahka pekara ti nyadi perati ba endur nya iya nya penyekut trafik ti ngachau pengawa bedaja ba endur nya.

“Kami deka berandau enggau piak baka Kaunsil Makit Betanam Betupi Perintah Besai (Fama) sereta bala pedaja ba endur tu bekaul enggau pekara tu.

“Enti nitih endang bisi palan parking kerita ba belakang tu, tang ditutup laban bisi pengawa ngaga begunan ba belakang nya diatu lalu kami enggai apa nama nyadi ngagai sida ti nengah jalai nya,” ku iya nerang ngagai pemberita.

Kelimpah ari nya, Junaidi madahka tuju pengawa bejalai kemari iya nya deka meda sereta beratika diri empu penanggul, timbal ari bala pedaja sereta chara DBKU mantu sida mutarka penanggul di Medan Niaga Satok.

“DBKU nguji deka mantu nambahka pemeresi sereta pemanah rampa endur nya ngambika ulih narit mayuh agi temuai bebelika barang ngagai endur tu.

KAUL ENGGAU PEDAJA… Junaidi betabi enggau siku pedaja ikan ba makit basah Medan Niaga Satok ditu.

“Entara pekara ti nyadi fokus kami pengudah bejalai tadi iyanya ba chara tusun palan bedaja, pemeresi palan bedaja, pia mega penyekut jalai,” ku iya madah.

Berebak enggau nya, Sapit Direktor Fama Sarawak Abdul Jaafar Lian madahka penyekut jalai alun ti ditapi mensia mayuh ti bebelika barang ba Medan Niaga Satok nya semina enda lama aja.

“Ba palan ke mayuh paking diatu benung digaga siti begunan tiga ringkat ti ngembuan 800 lot parking kerita.

“Nya alai, kami minta mensia mayuh ti suah bebelika barang ba Medan Niaga Satok sabar laban tu keguna jemah,” ku iya seraya madahka timpuh ngaga palan parking nya deka manggai dua taun.

KENANG… Junadi (tengah) disempulang Kaban Parlimen Santubong Datuk Seri Wan Junaidi (lima kiba) sereta Direktor DBKU Dr Morshidi Ahmad (lima kanan) sereta bala bukai sebedau pengawa bejalai ngelingi Medan Niaga Satok kemari.