KUCHING: Pengerami Sarawak Shines: Diwali The Sarawak Way majak mandangka penegut penyerakup rayat pupu bansa enggau jalai pengarap di Sarawak nengah penatai Tuai Pemegai Menua (TYT) Sarawak, Tun Pehin Sri Dr. Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi bejadi pengerami nya ba Palan Konvensyen Borneo Kuching (BCCK), malam kemari.
Penatai Tun Wan Junaidi enggau Toh Puan Fauziah diambat Sapit Premier Sarawak, Datuk Amar Douglas Uggah Embas enggau bini, Datin Doreen Mayang, Presiden Sri Maha Mariamman Temple Kuching, Datuk Shankar Ram Asnani enggau bini, Datin Karishma Shankar Asnani, Direktor Unit Pengarap Bukai (UNIFOR), Datuk Georgina Apphia Ngau sereta temuai dipebasa bukai.
Pengerami ti diatur Sri Maha Mariamman Temple Kuching enggau kerejasama UNIFOR nya mega digulu tuai pengarap ti ngari ke komuniti Kristian, Buddha, Tao, Sikh, Bahai enggau Hindu ngayan pengelantang ti nyadi identiti Sarawak.
Ba pengerami nya, Tun Wan Junaidi enggau Toh Puan Fauziah mega dinah bemacham pemakai India enggau menua seraya berandau enggau tuai komuniti India enggau temuai bukai.
Pemerindang tanda asal Deepavali, lagu Kollywood enggau budaya menua bela ngerichah pengerami nya. Ba jaku pengelalu, Shankar Ram meri terima kasih ngagai Tun Wan Junaidi ke jasa iya ngubah Konstitusyen Perintah Besai nyentuk Sempekat Malaysia 1963 (MA63) diaku lalu negi hak Sabah enggau Sarawak ba atur undang-undang menua.
Iya madah, Tun Wan Junaidi nya siku tokoh menua ti udah ngerandang jalai ngentapka penuduk konstitusyen nengeri Borneo nengah embing iya ti bisi prinsip enggau peneleba ba atur perintah sereta undang-undang. – EDISI UKAS
