BAU: Pengerami Kue Bulan enggau Tanglung Siniawan 2024 deka dipasuk ba kalinda dagang temuai ngambi ulih matak mayuh agi bala temuai ngagai kandang menua nya.
Kaban Kunsil Nengeri (ADUN) Serembu, Miro Simuh, madah kebuah pia laban program ninting taun tu udah mujur matak mensia mayuh ke datai ari bemacham serak komuniti.
Ku iya, pengerami tu ukai semina dirami komuniti China, tang bela dirichah raban bansa bukai.
Iya bejaku munyi nya maya Pengawa Bejadi Pengerami Kue Bulan enggau Tanglung Siniawan 2024 kemari.
Miro madah baru, Pengerami Kue Bulan enggau Tanglung Siniawan 2024 sekali tu udah mujur nyadi pelasar penyerakup pupu bansa, kelimpah mandangka bemacham pemanah penyelai budaya ba kandang menua Serembu.
Iya madah, program tu dirichah enggau pemakai asal, ke lebih agi kue bulan ti bemacham bansa enggau asai.
Kelimpah ari peranak menua nya, pengerami nya bela richah enggau penatai temuai Orang Asal ari Taiwan ke udah nemuai ba sekeda endur di kandang menua DUN Serembu.
Sama datai, Pegawai Pelilih Bau, Constantine Gerald David, Pemancha Komuniti Bidayuh Pelilih Bau, Robert Tom Juin, enggau Chairman Indigenous People of Taiwan, Toko Saiyon.
