KUCHING: Pengerami Makai Nengeri Serimbai Ngepun Aum Keterubah Penggal Kelima Kunsil Nengeri (DUN) Ke-19 diatur enggau mujur ba Kompleks DUN Sarawak, malam kemari.
Pengerami nya richah nengah penatai Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi.
Penatai seduai bela disempulang Premier Sarawak, Datuk Patinggi Tan Sri Abang Johari Tun Openg enggau anak iya, Dayang Nurjihan Datuk Patinggi Tan Sri Abang Johari.
Pengudah semua temuai dipebasa datai, lagu Ibu Pertiwiku ditebah sebedau pengerami diterus enggau pengawa mandang tanda Sarawak Maju Makmur. Pengawa nya ngayan pengelantang enggau penegut kaul penyerakup rayat pupu bansa di nengeri tu.
Udah nya, bala pemesai enggau temuai dipebasa beperindang enggau artis disempulang simfoni orkestra negeri Sarawak.
Pengerami nya bela digulu bala Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan Enggau Datuk Amar Prof Dr. Sim Kui Hian, Speaker Dun Sarawak, Tan Sri Datuk Amar Mohamad Asfia Awang Nasar, bala menteri, Sekretari Perintah Sarawak, Datuk Amar Mohamad Abu Bakar Marzuki sereta pemesai bukai. – EDISI UKAS
