BINTULU: Pengawa ngatur Pengerami Pantai Kampung Nelayan Batu Mandi di Similajau ukai semina program pemerindang komuniti aja tang nyungkak ngagai pemansang sektor dagang temuai enggau pengawa nyaga pesaka budaya lokal.
Sapit Menteri Infratruktur enggau Pemansang Penyangkai Kapal Sarawak, Datuk Majang Renggi madah, pengawa ngatur lumba rayat enggau pemerindang seni asal nya ulih nyadi pematak temuai sereta meri empas ngagai ekonomi peranak lokal.
“Seni main enggau lumba asal deka matak mayuh agi temuai sekali ke nya ari menua tu empu enggau menua luar datai kitu.
“Sida deka bebeli barang sereta meri mayuh pemaik ngagai sida ti ngaul industri dagang temuai baka hotel, restauran, pengangkut enggau industri krafjari,” ku iya.
Majang mansutka jaku nya rambau bejadi Pengerami Pantai Kampung Nelayan Batu Mandi ditu, Hari Enam tu tadi.
Terang iya, pengawa komuniti ngambi bagi ba program baka nya patut ditampung laban nya ukai semina ngidup semangat beserakup tang meri rega tambah ari sukut pengelala budaya enggau sosioekonomi.
Pengerami Pantai Kampung Nelayan Batu Mandi keterubah diatur Komiti Pemansang enggau Pengelikun Genturung Pendiau (JKKK) Kampung Nelayan Batu Mandi nengah kerejasama Kelab Lumba Rekreasyen Adventure Borneo sereta nerima sukung Opis Residen Bagi Menua Bintulu enggau Kaunsil Pemansang Bintulu (BDA).
