KUCHING: Pengudah 31 taun diatur, Pengerami Telaga Ai taun tu deka dirichahka agi enggau pengawa ngatur pekit regata ti nyendia perais besai sepenyampau RM80,000.
Pekit lumba perau ti kepenudi diatur ba taun 1992 nya nyadi aktiviti besai diatur serimbai Pengerami Regata Telaga Ai 2023 ti deka diatur kena 1 nyentuk 3 Disember tu ba Esplanade Telaga Ai ditu.
Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, pekara nya seraris enggau gaya sungai dia ti lurus sereta panjai urung enam kilometer (km) kelimpah ngembuan pengulih besai dikemansang nyadi palan lumba ai nya.
“Aku meda pengulih besai nya, nya alai, nyangka Regata Sarawak deka dikerembai ngagai Telaga Ai ba timpuh 10 nyentuk 20 taun ti deka datai.
“Laban lumba ai tu majak dikerindu, udah tentu pengawa ngatur lumba tu deka besai agi dudi hari lalu tebing Sungai Kuching pen udah enda chukup dikena nampung pemayuh penyereta ari selampur dunya.
“Nya alai, sitak ti ngembuan pengulih besai tu nyadi pilih alternatif ti engkeman ungkup pengawa ngerembaika Regata Sarawak,” ku iya.
Karim mansutka jaku nya rambau aum pemberita Pengerami Regata Telaga Ai 2023 ditu, kemari.
Ngelansa senentang pengawa ngatur Regata Telaga Ai taun tu, iya madah, naka ensanus, bisi 19 tim udah ngerejister diri ngambi bagi ba pekit nya lalu timpuh ngerejister diri nya agi dibuka nyentuk 21 November tu.
“Tu mungkur tujuh kategori baka Bidar 10, Bidar 15, Bidar 20, Bidar 25, Bidar 20 Pengayuh VIP, Bidar 30 Maraton (5 km) enggau Bidar 30 Raja Sungai.
“Raja Sungai deka mai perais mata duit RM15,000 enggau trofi lalu penyampau penuh perais ti disedia iya nya RM80,000,” ku iya.
Ngelansa silik, iya madah, pengawa ngatur pengerami nya dikena nempa Telaga Ai nyadi palan dikena bejalaika lumba ai Bagi Menua Kuching kelimpah ngelakuka palan nya nyadi palan pemakai tasik ti dikerindu.
