Penguna kuat media rama meseti bisi integriti

KUCHING: Pemujur nyadi siku orang tebilang tauka mayuh dikelala ba media rama meseti ngembuan tanggungpengawa madahka pasal pekara ti betul sereta engkeman.

Raban Kaunsil Direktor Angkatan Zaman Mansang Sarawak (Azam) Datuk Norhyati Mohd Ismail madahka genap orang ti dikelala ba media rama patut bisi integriti laban pengawa nya tau meri empas manah sereta jai ngagai orang bukai.

“Semua pekara ti dikunsika orang ti mayuh dikelala ba media rama tu meseti betul sereta engkeman laban sida deka meri empas ngagai pengidup orang bukai.

“Pia mega, nyadi siku ari penguna media rama kitai patut ngempu tanggungpengawa ti manah awakka pekara ti disebut tauka dipandangka ba media rama tau dipechaya orang bukai,” ku iya.

Norhyati bejaku munyi nya maya program nutup Bengkel Pemansang Penguna Kuat Media Rama ti ke-2 di SMA Creative Heritage Innovation Centre ditu, pagi tadi.