Pensil ngubah pengidup mensia

ARI sebatang pensil kitai belajar ngelala urup lalu ari sebatang pensil mega kitai landik nyebut genteran jaku, ku Norina Umoi Utot nibar jaku pesan Selamat Hari Pengajar ke diintu sehari tu.

Pia mega ku Norina, ari sebatang pensil kitai meretika reti jaku, ari sebatang pensil kitai nemu nengkebang genteran jaku ti siru.

“Ari sebatang pensil, kitai ulih meretika reta jaku ajar, ari sebatang pensil kitai deka ulih nulis karang panjai meretis baka rendai.

“Lalu ari sebatang pensil kitai lanchat nemu reti jurai penemu orang, ari sebatang pensil mega kitai deka bisi ngasaika penaluk ngagai jaku bansa diri.

“Nangkan nya ari sebatang pensil idup kitai deka menyana agi lalu runding kitai nyadi nyata, pemujur belipat, pengelantang ngiarka pengelemi sereta pegari nama, jelai rita diatu datai ari sebatang pensil,” ku Norina temegah.

Norina Umoi Utot

Iya ke mega pemungkal Projek Pensil chukup angkunka pengawa ngiri penemu ti dipun ari sebatang pensil, nyadika peransang berindik ari pemerinsa idup diasai kenyau ari mit menya.

“Semua tu bepun ari sebatang pensil ti nyadi bakih aku, keresa pemadu berega lebuh agi sekula primari menya.

“Pensil tu disempama baka pengajar ti nyadi sempun meri penampak ngagai bala nembiak.

“Nya kebuah aku chukup meretika pengawa bala pengajar ti ngembing pengidup bala nembiak nuju kuing pengidup ti menyana dudi hari lalu nyadika tenggau pengidup sida,” ku Norina nandu.

Setipak enggau rambai jaku Hari Pengajar 2019, Sempun, Meri Penampak Ke Menua, Norina ngarapka genteran jaku tu ngemai reti sereta nyadika lalau kitai semua.

PUH… Ngajar sida ke tuai ukai pengawa muntang dikereja lalu semua pekara tu mujur ari pengeliat ati bala pengajar.

“Selamat Hari Pengajar ngagai semua ex-pengajar, bala bakih sereta bala pengajar bukai lalu nadai pekara pemadu berega ngagai pengajar kelimpah ari pemujur bala nembiak sida.

“Ba ajar bisi pengarap, ba rara bisi sampi, ba ati nyima bisi penyiru, maya ke diau diri bisi pemintar runding disalam lalu ba jari iya deka nempa ulah ti menyana,” ku Norina meransang bala pengajar.

Terima kasih ke pengelurus enggau berekat penemu ti diiri enggau diajar kelebih agi nuju bala pengajar volunteer Projek Pensel, tandu Norina.

“Bala pengajar ti volunteer nyaup aku ngemujurka pejalai Projek Pensel kenyau ari taun 2015 suba lalu diatu majak mansang sereta mujur nyendiaka kelas ungkup orang tuai.

“Aku chukup temegah ati meda semengat diayanka sida tu, nadai kala sebanaka diri lelak, puh amat ngajar sida ke tuai enggau bala nembiak. Tabi puji nuju semua,” ku Norina nyimpul.

SIRU… Bala nembiak nyinuk mendingka lansa jerita iya diau enggau bekereja di menua tasik.