MUKAH: Bajet Sarawak deka dibantai kandang dua minggu da dikena meretika penuduk penatai pemisi menua tu.

Premier Sarawak, Datuk Patinggi Tan Sri Abang Johari Tun Openg madahka haribulan mantaika bajet nya deka dipadah kena 12 Oktober tu.

Nya alai, iya minta rayat nganti dulu pekara bekaul penuduk penatai pemisi nengeri ba haribulan nya ila.

“Aku deka mantaika Bajet Sarawak kandang dua minggu da.

“Aku semina ulih madahka peragam nya ngagai kita, entah bisi nambah tauka enda, nganti aku madah maya haribulan nya ila,” ku iya.

Abang Johari bejaku munyi nya rambau bejadi Program Sarawakku Sayang (SKS) di Mukah, kemari.

Dulu ari nya, iya madahka penatai pemisi Sarawak udah nambah dalam timpuh enam taun ke udah, ari urung RM6 ngagai RM7 bilion ngagai sekali lipat iya nya urung RM14 bilion.

Ku iya, tambah penatai pemisi deka ngemuntangka perintah nengeri nguna pemisi nya dikena bejalaika bemacham pemansang ti udah diperambu sereta dipejalaika dalam timpuh enam taun ke udah.

Iya, pengawa ngenegapka ekonomi Sarawak meseti terus dipejalai dikena nyungkak penatai pemisi nengeri sereta nentuka pemansang ulih dipejalai ungkup pemaik rayat.

Abang Johari mega nyemetak madahka Sarawak enda tau enda ngembuan penegap ekonomi kediri empu laban enda ulih bepanggai penuh ngagai agih belanja ari Kuala Lumpur tauka Putrajaya.

Ku iya, tambah penatai pemisi nengeri begunа dikena ngemuntangka Sarawak terus melanja pemansang nyengkaum sukut infrastruktur, betanam betupi, pekara pelajar enggau sektor rama.

“Anang irau seagi Abang Jo bisi, seagi Gempung Parti Sarawak (GPS) bisi, jeman ke mua kitai dijaga, nya aja kelai ulih dipadah aku ngagai kitai sebedau mantaika bajet tu ila,” ku iya.