KUCHING: Kaban Kunsil Nengeri (Adun) Engkilili Johnical Rayong Ngipa minta Premier Sarawak Datuk Patinggi Tan Sri Abang Johari Tun Openg berundingka meri agih belanja Projek Mit Pemansang Menua Pesisir (MRP), Program Transformasyen Menua Pesisir (RTP), nyeruri rumah enggau ke bukai ari Agih Belanja Perintah (Wang Rayat) ngagai semua pengari penyakal.
Ku iya, agih belanja nya patut diberi baka agih belanja ti diberi ngagai pengari rayat perintah ungkup tuju ‘Intu Sarawak’ kelebih agi ungkup rayat di sitak diri empu.
“Ari nya, penegap politik deka ulih dijamin enggau dijaga ngambika Sarawak deka terus maju dalam napi Pasca Covid-19,” ku iya.
Rayong bejaku munyi nya rambau betalatka mosyen jaku basa ari Tuai Pemegai Menua (TYT) Tun Pehin Sri Abdul Taib Mahmud maya ba Aum Dun, kemari.
Ku iya, peranak di sitak Engkilili mantaika mayuh peminta ngambika bulih pemendar enggau diperatika raban bekaul baka penanggul jalai, jematan enggau bekal ai beresi.
“Jalai penyambung nuju Rumah Lidom Sungai Paya, jalai ke Sekula Primari (SK) Nanga Menjau enggau Rumah Upok, Rumah Mengga-Rumah Juan di Panchor, Rumah Rimong Begantong, Rumah Emperan, Rumah Dau Nanga Entalau enggau Rumah Sawing di Ulu Skrang patut diseruri.
“Gaya jalai penyambung tu udah balat jai lalu ngasuh rayat napi penusah lebuh mindah ari rumah panjai ke mengeri, klinik, sekula enggau meli barang kelebih agi lebuh bisi penusah ngenyit bekaul pekara pengerai,” ku iya.
Entara jalai ti patut nerima perati tu iya nya Jalai Simpang Sebeliau-Simpang Gelong enggau Berenggang di Lubok Antu ti udah belubang.
Ku iya, penanggul jalai tu bisi dibai iya ngagai Opis Kereja Raya (JKR) tang lalu nadai diputarka ngujungka peranak rumah panjai empu gawa beripai ngurangka penanggul nya enda lama.
“Aku mega minta Jalai Ulu Skrang nyengkaum jematan mit di Nanga Belaie ngagai Panchor Ulu Skrang diseruri.
“Kelimpah ari nya jalai nuju Belawan, Ulu Akup, Pelo, Pulau, Rumah Gait Keranggas enggau Rumah Blissan Tinting Pisang mega di Ulu Skrang patut diseruri.
“Tu mungkur jalai penyambung ari Rumah Will-Stuga, Engkilili nuju Ensurai, Basi, Tanjong, Langkong enggau Pak di Batang Ai Ili,” ku iya.
Iya nandu madahka jalai bukai ti patut diperatika perintah iya nya jalai Geligau Ili enggau Geligau Ulu, jalai nuju Rumah Timbang Spalau Bukit nengah Kampung Memaloi Batu 8, jalai SK Merebong nuju Rumah Ambun, jalai Bua, Selindong nuju ke SK Engkilili, jalai nuju Skim Merindun, jalai nuju Jematan Gantung Merio enggau jalai Tebarong Skrang.
Kelimpah jalai, Jonical mega minta ngambika perintah nganti Jematan Gantung Merio neresa Sungai Batang Ai Engkilili ngagai jematan semin ngambika lebih likun ditengah rayat.
Iya mega minta awakka perintah meri perati ngagai penanggul bekal ai beresi di semua rumah panjai di Batang Ai Ili, Skrang Ili, Tebarong, San Semanju, Gelong enggau Berenggang ti bedau tembu penuh.
