PENGALUS enggau penyelai kraf Sarawak udah narit ati Raja Permaisuri Agong Tunku Hajah Azizah Aminah Maimunah Iskandar lebuh ngabas reruai Hari Kraf Nasional 2023 di Kompleks Kraf, Kuala Lumpur.

Raja Permaisuri Agong mega tekait ati meda pengalus tikai anyam bebuah ti dianyam bala pedagang kraf Sarawak.

Ba eksibisyen nya, lebih 380 reruai bisi disedia lalu nyual bemacham produk kraf ari selampur Malaysia.

Bemacham produk kraf ari Sarawak bisi dijual enggau matak pengusung baka pua kumbu, selampai, kain buriek, tikai, kantung enggau produk leka manik.

Seraya bayam pemanah produk kraf ari Sarawak, Raja Permaisuri Agong mega udah meli sekeda produk kraf nyadi pengingat enggau tepa.

Ba eksibisyen Hari Kraf Nasional 2023 berambai ke jaku ‘Ini Kraf Malaysia’, Sarawak Energy udah mai enam pedagang ari Murum, Bakun enggau Baleh ngelakuka produk kraf sida nengah Program Ngelaku Kraf.

Entara pedagang tu iya nya Selin Gelang, Shenny Asan, Jane Kiong, Connie Hurang, Josefine Midong enggau Selin Eram asal ari Murum, Bakun enggau Baleh.

Eksibisyen pengelama 12 hari nya udah meri penguntung besai ke alai bala pedagang mujur bulih untung manggai RM49,000.

NGELAKU PRODUK KRAF

Ungkup penerang, Program Ngelaku Produk Kraf dipejalai Sarawak Energy nya ngembuan batang tuju mantu komuniti ngetan pesaka asal seraya ngelaku produk kraf ngambi rembus ngagai makit menua enggau antarabansa.

Program nya mega meri latih enggau sukung ngagai raban pedagang ngansah pengelandik enggau penemu sida pasal chara nengkebang produk kraf.

Kelimpah ngetan enggau nyagu pesaka asal, inisiatif nya mega dikena ngangkatka pengaya Sarawak ari sukut main asal sereta bebasa ke penyelai pengeraja nya.

Ukai semina nya aja, inisiatif nya mega meri peluang ngagai pedagang menua berani ngelakuka produk diri empu ngagai bala pedagang sereta ngerandang makit ba produk asal enggau moden.

Hari Kraf tu mega peluang ngagai pedagang ari Murum, Baleh enggau Bakun ngerandang dagang ngambi majak dikelala sereta dikerindu bala penguna ba selampur Malaysia.

NYUKUNG PEDAGANG

Menijar Besai Tanggungpengawa Rama Korporat Sarawak Energy, Jiwari Abdullah madahka diri temegah ulih mantu pedagang kraf enggau komuniti ba Sarawak.

“Kami berasai temegah ulih mantu peedagang kraf enggau komuniti engah Program Ngelaku Produk Kraf ke nyadi sebagi ari inisiatif CSR ngubah tikas idup enggau ngetan pesaka asal.

“Kami mega pechaya nengah eksibisyen baka tu, rebak biak bisi pengingin ba industri kraf sereta nyendia peluang ekonomi tegap ungkup komuniti.

“Tu mega dikena ngetan pengeraja asal enggau ngelaku penyelai ba Malaysia,” terang iya.

Bini Menteri Besai Malaysia ke mega Kaban Parlimen Bandar Tun Razak, Dato Sri Dr Wan Azizah Wan Ismail disempulang Menteri Dagang Temuai Seni enggau Main Asal, Datuk Sri Tiong King Sing udah ngabas reruai kelai nyukung pengawa sida.

Sama datai Sapit Menteri ba Opis Menteri Besai (Pekara Sabah enggau Sarawak) Datuk Wilson Ugak Kumbong, Menteri ba Opis Premier Sarawak, Datuk John Sikie Tayai; Kaban Parlimen Baram, Datuk Anyi Ngau; Kaban Parlimen Igan, Ahmad Johnie Zawawi, Kaban Parlimen Betong, Dr. Richard Rapu; Kaban Parlimen Puncak Borneo, Datuk Willie Mongin, Kaban Parlimen Tanjung Manis, Yusuf Abdul Wahab enggau Adun Murum, Kennedy Chukpai Ugon. Mandal Tuai Presiden Servis Korporat Sarawak Energy, Hajah Siti Aisah Adenan madah, Sarawak Energy keran mantu komuniti sereta temegah ngelaku produk kraf nengah Program Ngelaku Produk Kraf nya.

“Nengah pengawa mantu pedagang ngelaku produk kraf sereta mandangka pengelandik sida, kami ngarap ulih meri peransang ngagai rebak biak ngelaku produk sereta ngerandang peluang ekonomi,” terang iya.

TEMEGAH

Nampung baru kenang, siku pedagang benama Jane Kiong madahka diri berasai temegah laban ulih datai ba eksibisyen nya sereta bulih kenang enggau peneleba berega.

“Chukup temegah dibai enggau diembing Sarawak Energy ngujung ke kami ulih ngulu eksibisyen tu lalu bulih penemu enggau peneleba baru.

“Program baka tu ukai semina ngansah pengelandik kami tang meri peneleba baru sereta ngerandang peluang ngelaku produk kraf ngambi rembus ngagai tikas tinggi agi,” ku Jane nyimpul randau.