BINTULU: Orang luar enda ulih merintah Sarawak enti rayat beserakup, tang enti kitai pambar dia orang luar chukup muntang ngambi Sarawak, ku Menteri Utiliti Datuk Sri Dr Stephen Rundi Utom.
Nya alai. kaban parti komponen Gempung Parti Sarawak (GPS) patut bekerejasama dalam siti tim anang ngira ari ni parti ke diari.
Laban ngasai diri kaban parti komponen, sida patut ngiarka bida parti laban Sarawak deka napi siti pengawa bepilih besai ke chukup besai reti nentuka pendiau nengeri tu jemah, ku iya.
Politik ukai siti pekara ke entap, politik endang ‘very tiring’, ku iya rambau bejadika Licha Nambahka Penemu Indu GPS Bintulu “Cabaran Politik Masa Kini” bepalan ba sebuah hotel tebilang ditu, pagi tadi.
Nya alai, iya minta semua kaban GPS patut seruruan ngelala bagi pemansang isu ke nyadi lalu belajarka chara utar kelimpah napi piak ke dilaban.
Urung 150 kaban Indu GPS ngarika Dun Tanjung Batu, Samalaju, Jepak enggau Kemena bisi ngulu licha ke diatur Indu GPS nya.
Rundi ngarapka semua penemu ke diulih ari licha nya ulih mantu Indu GPS ba sitak diri napi PRN deka datai.
Iya madah diri gaga beratika penyerakup entara raban indu GPS taja bebida penatai parti tang ulih begulai.
