Penyerakup pupu bansa meri pengelebih

LUBOK ANTU: Pupu bansa enggau macham main asal nyadi pesaka pemadu berega nengeri tu lalu nyadi tanggungpengawa semua rayat ngangkatka iya nengah penyerakup enggau basa ngagai pangan diri.

Kaban Parlimen Lubok Antu Jugah Muyang madah, pengelebih ba penyerakup ti dikembuan tampak dipeda lebuh ngintu hari besai ti diintu bepelasarka ari adat enggau pengarap dikemeranka bansa.

“Taja kitai enda sama bansa enggau jalai pengarap tang nya ukai nekul kitai begulai ngintu hari besai.

“Ulah tu ba aku besai amat reti kelimpah aku pechaya tu nyadi pengering dikena nempa Malaysia baru ti berurun agi ba pengidup enggau likun,” ku iya.

Jaku iya tu dipansutka Jugah lebuh ngulu Pengerami Aidilfitri Kampung Melayu Lubok Antu, empai lama ke udah.

SELAMAT DATAI… Mensia mayuh nyambut penatai Jugah rambau Pengerami Aidilfitri Kampung Melayu Lubok Antu, empai lama ke udah.

Ku Jugah, ulah bebaik ngintu hari besai begulai baka nya negutka agi tanggam kaul ti nentuka pengelikun pengidup rayat nengeri tu meruan dipebasa.

“Peluang berami baka tu ukai semina dikena kitai ngabang enggau ngusung pangan diri aja tang awak ti engkeman ngagai kitai ngaul diri semak agi sereta nerima enggau bebasaka penemu bala bukai.

“Ari nya kitai deka nemu silik agi nama bagi pekara ti nyadi lalu kitai deka bebasaka sida, nyeliahka diri ari saru penemu, salah peragam,” ku iya nampung.

Iya madahka diri endang chakah gawaka rayat dia ti udah milih iya nyadi pengari sida sereta ngelempaika tanggungpengawa besai ba bau iya.

Semua peminta deka naka ulih ditangkup lalu hak rayat dia mega endang diintu iya meruan.

“Semua tu setipak enggau juluk ati Perintah Besai ti dekaka pemansang di menua pesisir berunyut nyadi baka ba mengeri,” ku iya madah nyemetak.

Berebak enggau pengerami nya, Jugah bisi ngagihka belanja penyampau RM10,000 ngagai Komiti Pemansang enggau Pengelikun Genturung Pendiau (JKKK) enggau RM5,000 agi ngagai Raban Indu Komiti Melayu Lubok Antu.