KUCHING: Bengkel Bungai Jarau ti diatur sepengelama dua hari ba Indu Opis Komiti Pemansang enggau Pengelikun Genturung Pendiau (JKKK) Kampung Tabuan Dayak mujur matak penyereta peranak menua ti deka nyerungkai enggau belajar seni pengelandik asal.
Bengkel ti diatur kena 26 enggau 27 Julai tu tadi diatur begulai Kaunsil Kraf Sarawak enggau Gerempung Budaya JKKK Dayak Kampung Tabuan.
Program tu ngembuan tuju deka meri penerang sereta ngintu pesaka asal kraf menua tu, kelebih agi bungai jarau.
Nyadi siti ari elemen kraf asal ti majak jarang ditemu, bungai jarau dipilih nyadi batang pekara bengkel nya nentuka teknik ngaga kraf tu terus ditampung rebak dudi.
Pengajar bengkel tu iya nya Ngo Hawing, siku tukang ti bepeneleba sereta udah lama ngemeran pengawa ngaga bungai jarau.
Bisi 20 penyereta ngambi bagi ba bengkel tu, ti mungkur peranak Kampung Tabuan Dayak ti ngembuan pengerindu belajarka pengelandik ngaga bungai jarau terus ari sida ti landik. Hari keterubah bengkel tu dipun enggau pengawa bejadi ari Tuai Rumah Kampung Tabuan Dayak, iya nya Tuai Rumah Maria Assim.
Udah nya, bala penyereta dibai ngagai kampung ti besemak dikena ngelala bansa kayu ti engkeman dikena ngaga bungai jarau. Entara bansa kayu ti dikelala e n g k e m a n dikena baka kayu Tebulan, Purang, Engkubong ti mega dikumbai M e r e k u b o n g tauka Kubong, Baruk, Getah enggau pun koko.
Kayu tu nyadi kereban ti chukup beguna ba pengawa ngaga bungai jarau tradisional.
Licha penerang pengelama 30 minit diberi pasal tukuh kayu ti manah sereta proses keterubah nyendia bungai jarau nya.
Bala penyereta dipadah chara ngupak kulit kayu sereta proses nyembi batang kayu pengelama tiga hari nentuka kualiti kereban nya ba tikas ti pemadu manah.
Udah nya, bala penyereta diterang pasal atur pasal teknik ngukir kayu ngena kereban asal.
Ba hari kedua, bala penyereta berengkah belajar ke teknik ngaga mayuh macham tukuh Bungai Jarau, nyengkaum versyen klasik, kayu Krismas enggau versyen pemandang ti digitang nyadi kereban pengias rumah.
Sepanjai bengkel tu, genap penyereta diberi awak ngaga bungai jarau ari iring pengajar sereta ngiri peneleba belajar ti praktikal agi. Ba pengujung bengkel, semua penyereta nerima setipikit dikena meri terima kasih laban udah ransing belajar pengelama dua hari nya.
Kaunsil Kraf Sarawak enggau Gerempung Main Asal JKKK Kampung Tabuan Dayak ngarapka bengkel tu ulih ditampung dudi hari nyadi pengeransing ngetan enggau ngelaku kraf menua kelebih agi ungkup rebak biak.
