SIBURAN: Siku lelaki lunggar umur mujur nyelamat rumah iya empu ari penusah angus nengah pengawa ngerara api ngena ai paip.

Pengari ari Bilik Operasyen Bomba Sarawak madah, raban sida nerima kangau ngenyit bekaul penusah nya urung pukul 2.41 dini hari tadi.

Iya madah, penusah nya ngaul siti rumah di Lorong Siburan 8, Kampung Siburan ditu.

“Pengudah nerima kangau ngenyit nya, seraban bomba ari Balai Bomba enggau Penyah Penusah (BBP) Siburan digerah ngabas palan penusah nya.

“Lebuh datai ba palan nya, endang amat bisi penyadi penusah angus ti ngaul siling belakang rumah enggau tugung barang lama di rumah nya.

“Taja pia, api ti nganguska rumah nya mujur dirara pengempu rumah nya ti beumur 75 taun ngena ai paip ti bisi dia sebedau penatai raban bomba,” ku iya ba sebengkah penerang tadi.

Iya madah, raban bomba ngena siti hos bantu keterubah ai ari jentera bomba dikena ngerara teda api nya sebedau ngenuku palan nya likun.