Perais minta perintah berundingka Atur Bekurung

SIMUNJAN: Persatuan Anak Istimewa Sarawak (Perais) minta Perintah Besai neritka agi Atur Tagang Pejalai (PKP) baka renggat keterubah tauka bejalaika Atur Bekurung pengelama 14 hari dikena mutuska rantai igi penyakit Covid-19.

Sekretari Besai Perais, Annuar Putit, madah, pemutus perintah besai ngasuh kedai baka hardware, tamu tauka kedai renchit bedagang ngujungka pasar nyau dedat alai mensia mayuh mindah.

Tambah mega ku iya, dagang baka nya ukai servis ke enda tau enda bisi jam diatu.

“Pekara dikenangi kitai iya nya apai indai nyau bebaika anak sida meli utai ke pasar nyau baka menua diatu nadai dituntung penusah.

“Tu jauh bebida lebuh PKP renggat keterubah ti balat diterit ke alai semina palan besai bebelika barang, farmasi, klinik, bank enggau sepital aja dikemendar gawa,” ku iya ba penerang ditu tadi.

Nya alai ku Annuar, manah agi enti perintah berunding ngaduka Atur Bekurung pengelama 14 hari.

“Ba timpuh nya, Perintah Besai enggau Perintah Sarawak nengah ejensi bekaul meseti meri bantu baka bantu barang pemakai ngagai rayat, genap pintu,” ku iya madah baru.