SIBU: Taun 2025 nyadi siti kelai ba kitai bansa Iban laban Woksyop Ngerembaika Pantun Iban ti keterubah mujur diatur ba Tanah Kenyalang.
Tuai Pengatur, Asat Nawin madah, nya siti ari juluk ati sida ngerembai enggau nyagu pemesai reti sada enggau leka Pantun Iban.
Ku iya, juluk besai sida deka meda Leka Pantun Iban ukai semina disada bala menyadi ba Kapit aja, tang mega disada ba tetiap bagi menua kitai ba Sarawak.
“Aku enggau bala komiti besai endar pengarap, taun tu nyadi kelai enggau mungkal singkang kitai nuju pemujur besai agi ba pengawa ngerembai enggau nyagu reti sada enggau leka Pantun Iban.
“Kami sebuat dekaka Leka Pantun tu tadi ukai semina disada bala ba menua Kapit aja, tang ulih disada peranak ba tetiap bagi menua selampur Sarawak,” terang iya.
Asat nerang pekara nya lebuh dirandau pemberita senentang pengarap iya ba Woksyop Ngerembaika Pantun Iban 2025 ti diatur ba Rumah Rantai Ugak, Luyang Baru, Skim Sekuau ditu, ujung minggu tu tadi.
Iya madah baru, raban sida mega udah merambu ukai semina deka ngerembai tang mega ngemansangka Pantun Iban nya ba taun baru.
“Laban udah bisi peluang diberi Kaban Kunsil Nengeri (ADUN) Tamin, Ir. Christopher Gira Sambang enggau sukung ari Yayasan Tun Jugah, kami merambu ngemansangka Pantun Iban tu ba taun 2026.
“Ukai semina nya aja, Komiti Pengatur sigi Ngarapka sukung enggau bantu ari bala Gempung Ukai Dikuasa Perintah (NGO) bukai, palan pelajar tinggi enggau sekula begempung ngatur program pelajar baka tu besai agi enggau nadai bebayar.
“Tu mih peluang kami nyagu enggau meri penemu ti menyana ngambi utai tu tadi mantu pengawa sekula sereta ke penemu rama bansa kitai,” ku iya nyemetak.
Nambah ke nya ku Asat, woksyop ti keterubah nya ukai semina nalan belajar aja, tang pelasar besai negapka identiti budaya ti dikemegah bansa kitai.
Ari inisiatif baka nya, Pantun Iban deka terus idup nyadi sada budaya ti beakar dalam pesaka aki ini enggau ngangkatka pendiau Dayak ngagai tikas tinggi agi jemah.
“Pelaba aku, tu mih siti projek ungkup komuniti bansa kitai kelebih agi bala penyereta ti datai nadai bebayar.
“Tabi puji mega ngagai bala komiti, Komiti Pemansang enggau Pengelikun Genturung Pendiau (JKKK) Rumah Rantai ti udah mantaika pengiruh, lempung ati enggau tulang sama besaup enggau kami ngatur pengawa tu enggau mujur.
“Ngarap ke taun 2026 kitai ukai semina ngerembai tang ngemansang Pantun Iban, Jaku Iban enggau Leka Main ngambi mayuh agi orang ngelala Adat enggau Budaya bansa Iban,” ku Asat nyimpul randau.
