KUCHING: Peranak di Batu Kawah amat benasip laban deka ngembuan sebuah palan rekreasyen ti manah endur ngelantangka ati seraya nyadi palan pengerembai dagang ekonomi.

Kepala Menteri Datuk Patinggi Abang Johari Tun Openg madahka dalam ngemansangka sebuah mengeri tauka palan pengari rayat mesti ngembuan perambu ti nyemetak.

“Enda nyangka Batu Kawah ulih dikemansangka nyadi sebuah palan ti manah.

“Baka ti ditemu kita, renggat keterubah enggau renggat kedua taman tu udah tembu semina tinggal renggat ketiga enggau keempat,” ku iya.

Abang Johari bejaku munyi nya lebuh Bejadika Taman Riverbank Batu Kawah ditu, ensana.

Ku iya, pemansang tu mega ulih digaga laban menua ngembuan sebuah perintah ti likun enggau pupu bansa ti beserakup.

“Getil pah kanan, pah kiba berasai pedis, lebuh bisi orang nganu bansa Iban, bansa Melayu deka ringat, laban kitai begulai ari mit, tu meh Sarawak Sebilik.

“Menteri Besai bejaku, nyema kitai deka meda reti Malaysia Sebilik, meda ngagai menua Sarawak, ukai aku bejaku munya nya.

“Nya alai, Menteri Besai ngelancharka Malaysia Sebilik di Sarawak,” ku iya.

Nangkan ke nya, iya madahka projek nyambung jematan nuju Rantau Panjang (renggat ketiga enggau renggat keempat Taman Riverbank Batu Kawah) nangkan ke tu deka diteruska seagi GPS megai perintah.

Ungkup penerang, Taman Riverbank Batu Kawah renggat keterubah enggau kedua tu ditembuka nengah agih belanja penyampau RM8.8 juta.

Berebak enggau nya, Menteri Kandang Menua enggau Pengawa Berumah Datuk Seri Prof Sim Kui Hian madahka Taman Riverbank Batu Kawah deka nyadi kelai palan pesaka enggau palan dagang temuai menua.

“Mayuh projek pemansang benung digaga ba Batu Kawah baka mutarka penanggul suah bah di Desa Wira, Balai Lumba/Komuniti enggau Hab Inovasyen sereta ke bukai.

“Aku beterima kasih ngagai raban pengundi ti udah nyukung aku ngelama tu ngujungka sida ulih ngasaika pemansang di Batu Kawah,” ku iya.