KANOWIT: Pengawa ngaga baru Rumah Komiti Pemansang enggau Pengelikun Genturung Pendiau (JKKK) Rumah Nasa @ Lika Francis di Bukit Sesanggau, Sungai Mapai tembu menyana.
Projek Rumah JKKK Rumah Nasa @ Lika Francis ti beungkus RM150,000 tu mega meri pemaik ngagai peranak rumah panjai dia.
Kaban Kunsil Nengeri (ADUN) Ngemah, Anyi Jana madah, projek Program Transfomasyen Menua Pesisir (RTP) nya entara inisiatif perintah nyendia perengkaguna ti diguna peranak menua pesisir.
“Projek ti dipejalai Opis Kereja Raya (JKR) ti nyadi ejensi teknikal nya beungkus RM150,000.
“Sekumbang aku nyadi pengari rayat ungkup Kunsil Nengeri (DUN) Ngemah, semua rumah panjai ba sitak Ngemah udah nerima pemaik projek RTP nitih peminta sida,” ku iya lebuh bejadi projek nya enggau Pengerami Ngiling Bidai JKKK Bukit Sesanggau Sungai Mapai, Jalai Nibong Tada, Hari Enam tu tadi.
Nambah ke nya, Anyi mega nyemetak madah ke pemesai guna penyerakup entara peranak rumah panjai nentuka mayuh agi pemansang ulih dibai ngagai sitak DUN Ngemah dudi hari.
Ku iya, pemansang ti deras agi semina ulih dijapai nyema komuniti terus seati sereta meri kerejasama ngagai tuai ti bisi diatu.
“Penyerakup deka negap sada rayat seraya ngemuntang inisiatif mai mayuh agi pemansang ngagai perati perintah enggau opis menteri bekaul,” ku iya nyemetak.
Berebak enggau nya, iya meri tabi puji ngagai 69 nembiak ari Sekula Sekondari (SMK) Nanga Dap enggau SMK Kanowit ti bulih pemutus nyulut ba peresa Sijil Pelajaran Malaysia (SPM), empai lama.
Iya ngarap apai indai terus ngesan pangku pengawa besai nentuka anak bulih pelajar dikena nyamin pengidup ti menyana agi.
Ba pengerami nya, Anyi ngemendar geran Projek Mit Pemansang Menua Pesisir (MRP) sepenyampau RM 5,000 ngagai JKKK Rumah Nasa @ Lika enggau RM 3,000 ngagai Gerempung Indu Rumah Nasa @ Lika dikena ngemujur aktiviti ninting taun sida. – EDISI UKAS
