SELANGAU: Kualiti idup peranak Rumah Lawang, Bukit Baru ditu majak tejamin berindik ari pengawa ngatur Program Pengelantang Komuniti MADANI (SejaTi MADANI) ti nyendia bangku urut moden.
Inisiatif Pemansang Ekonomi Komuniti Genturung Pendiau ti ngaul agih belanja sepenyampau RM100,000 nya dikena nyendia bangku urut moden ungkup pemaik peranak dia ti ngemeran pengawa betanam betupi.
Tuai Rumah Lawang madah, pengawa meri bangku urut nya beguna amat ungkup guna pengerai raban orang tuai ti suah napi penanggul pedis isi.
Terang iya, fasiliti nya mantu peranak beurut dikena nyuman penanggul pedis isi enggau lelak pengudah bekebun.
“Fasiliti tu beguna ba pengerai komuniti kami ditu,” ku iya.
Peranak dia semina mayar RM5 aja ungkup sesyen urut pengelama 20 minit kelimpah enda kelalu bepanggai ba pengawa beurut chara lama ti begunaka pejalai ti jauh di mengeri.
Siku peranak dia, Ningkan Unsu, 60, meri terima kasih ngagai inisiatif nya ti ulih ngurang penusut runding enggau ngenyamaika tubuh.
“Pengudah ngena bangku urut tu, tubuh aku berasai lempung sereta ulih mantu muai penusut runding pengudah lelak gawa,” ku iya.
Pengawa bejalaika projek tu mandang komitmen perintah nentuka rayat menua pesisir ulih ngasai pemansang inklusif ti meri empas ngagai rayat. – RJ
