KUCHING: Perancis madahka diri sedia nyukung pemansang AirBorneo, nyengkaum ngena penemu pakar enggau peneleba Airbus ke bisi sejarah kerejasama lebih 50 taun di Malaysia.

Duta Besai Perancis ke Malaysia, Marc Abensour madah, Airbus ngembuan mayuh peneleba ba mayuh bidang aeronautik di Malaysia lalu nya bela ngining kerejasama bukai begulai enggau kompeni AirBorneo.

“Udah tentu, ba bidang aeronautik, kami berandauka baka ni Perancis ulih nyukung pemansang AirBorneo, nyengkaum ngena manah pemisi Airbus di Malaysia.

“Airbus bisi sejarah kerejasama pengelama lebih 50 taun di Malaysia ke mungkur mayuh bidang baka ngintu, ngadu enggau miki (MRO), latih, sereta pemansang minyak meruan ungkup bilun.

“Kami bela berandauka pengulih kerejasama bukai enggau AirBorneo,” ku iya mantaika perambu.

Marc nyebut pekara nya lebih dirandau pemberita pengudah ngatur penemuai basa ngagai Sapit Premier Sarawak, Datuk Amar Awang Tengah Ali Hasan tembu Pengawa Bejadi Sarawak Global Supply Chain & Sourcing 2026 ba siti hotel tebilang ditu, Hari Dua.

Berebak enggau nya, iya madah, raban sida mega berandauka engka kerejasama entara Palan Pansik Betanam Betupi Perancis ungkup Pemansang Antarabansa (CIRAD) enggau UPM Sarawak dikena ngaga kar kampung di Sarawak.

“Asil serenih ke betul enggau ulih dipechaya tau nyadi pemun ngagai pemansang aktiviti dalam industri kayu ramu enggau berumah.

“Tu nyengkaum pengawa ngemansangka malin antarabansa dikena nirika begunan tropika mimit karbon,” terang iya.

Kelimpah ari nya, ku Marc, randau bela mungkur pemansang kuasa ulih dikena baru nengah kaul kompeni Perancis baka EDF ke bisi ati nyerungkai projek kuasa hidroelektrik sereta sukut ngatur grid.

Iya mega madah, kerejasama ke bisi pengulih iya nya besaup enggau kompeni baka Air Liquide enggau Axens ungkup ngemansangka projek mansutka Minyak Bilun Meruan (SAF). — EDISI UKAS