BINTANGOR: Perintah Sarawak nyendia bemacham inisiatif dikena mantu raban orang tuai ba nengeri tu kelimpah nentu raban nya meruan regas enggau produktif.

ADUN Meradong, Datuk Ding Kuong Hiing madah, kelimpah meri bantu pengintu pengelantang ngagai sida ti patut nerima bantu nya, bemacham inisiatif bukai disediaka perintah nyengkaum meri Kad Emas Kenyalang (KGC).

Iya madah, raban nya bela diperansang ngaul aktiviti pengintu pengelantang ti deka nempa sida nyadi peranak menua tu ti ulih meri pemaik sereta enda dikelaung ba komuniti.

“Perintah mega meransang sida begulai ngaul aktiviti volunteer dikena meri pemaik ngagai ruang bilik, komuniti enggau menua.

“Udah tentu peneleba berega enggau pangku pengawa sida beguna amat dikena nempa menua beserakup, begempung enggau ulih besemekih nuju pemansang,” ku iya.

Kuong Hiing mansut jaku nya rambau ngulu program begulai enggau raban orang tuai ditu, kemari.

Iya madah, pengawa meri KGC bukti raban nya seruran dikemerat sereta enda dikelaung taja pen dunya berubah berebak ari segang pemansang enggau pengerembai besai teknologi digital.

Ba lansa sebaka, iya ngelalau semua orang meri kerejasama penuh ngambi raban nya ti patut nerima bantu ari perintah enda tinggal nerima bantu nya.