SARATOK: Agenda begulai entara Perintah Sarawak enggau Perintah Besai ba sukut pelajar majak ditegap dikena nentuka nadai siku anak Sarawak tinggal ba pelajar.
Kaban Dewan Negara, Senator Pele Peter Tinggom madah, sektor pelajar seruran nyadi pekara dikemerat perintah laban nya pugu ti beguna amat ba pemansang komuniti.
Iya madah, ba renggat Perintah Sarawak, bemacham inisiatif udah enggau benung dipejalai dikena nentuka akses pelajar ulih diasai ke semua serap komuniti kelebih agi ba menua pesisir.
“Pia mega, ba renggat Perintah Besai, bemacham bantu diberi nyengkaum Bantu Tumu Besekula (BAP), Langgur Pemakai Tambah (RMT), sekularship enggau program sukung pelajar ungkup ruang bilik bepenatai pemisi baruh
“Pekara tu nyengala mandang pelajar nyadi agenda begulai entara Perintah Sarawak enggau Perintah Besai,” ku iya.
Pele bejaku munyi nya rambau bejadi Pengerami Mantar Gawai Gerempung Apai Indai enggau Pengajar (PIBG) Sekula Primari (SK) Mudong 2026.
Tampung iya, Perintah Sarawak bela nyendia bemacham bantu belanja ngagai bala nembiak nyengkaum bantu bayar pelajar, sekularship nengeri sereta inisiatif pelajar pechuma ba institusyen pelajar tinggi (IPT) diempu perintah nengeri.
Pia mega, ku iya, perintah meri perati ba pemansang infrastruktur pelajar nyengkaum ngaga enggau nyeruri sekula kelebih agi ba menua pesisir dikena nempa gaya belajar ti lantang enggau kondusif.
“Nambah ke nya, bemacham program sukung bisi diatur baka program pemansang pengelandik dikena nentuka nembiak disikap napi pemar dunya moden,” ku iya.
Iya nyemetak madah, penyulut pelajar ukai bepanggai ba inisiatif perintah aja tang begunaka kerejasama rat entara raban sekula, apai indai, komuniti enggau tuai lokal.
