KUCHING: Opis Menteri Pengangkut ngembuan perambu deka nampung meri bantu tikit bilun (Flysiswa) ba taun baru ngagai nembiak universiti perintah ti deka pulai ke menua rambau musin pengerami enggau kemisi semester.
Sapit Menteri Pengangkut, Datuk Hasbi Habibolah madah, bisi 56,000 nembiak dipelaba deka bulih pemaik ari bantu subsidi nya.
Ku iya, nengah bantu nya, tating belanja nembiak ti nampung pelajar diri ba Semenanjung Malaysia, Sabah enggau Sarawak deka lempung agi.
“Kami ba opis menteri deka minta bajet dikena nampung Flysiswa sereta nyelinting urung 56,000 nembiak nerima bantu tu.
“Nya alai, bala anak kitai ulih merambu penerebai bilun dikena sida pulai kemisi enggau ti bukai,” ku iya.
Hasbi bejaku munyi nya lebuh ditanya pemberita pengudah bejadi Operasyen Radar ba Kuching ba baruh projek KKFIR ditu, kemari.
Iya madah, pengawa meri bantu subsidi nya ungkup meli tikit bilun penyampau RM300 ti diberi sekali (one off).
