KUCHING: Perintah Sarawak ngelaluka institusyen pansik ari Borneo enggau serata dunya meranakka puku ba nengeri tu kelebih agi ba pengawa ngasilka produk baru enggau mutarka sekeda penanggul dunya.
Premier Sarawak Datuk Patinggi Tan Sri Abang Johari Tun Openg madahka raban institusyen tu ulih meranakka puku sereta mantu perintah ba sukut pansik kelimpah meri tauka besilih penemu baru ngenegapka penau.
“Sarawak udah ngelaika diri empu nyadi sebuah nengeri ti maju enggau pengerandang teknologi gadung, kuasa hidro enggau hidrogen, kelimpah ngemajuka diri ba mayuh bengkah industri ‘hiliran’ ungkup menua nyentuk ngagai tikas Asia Tenggara.
“Kami seruran ngiga chara pemansang ti baru dalam industri inovatif, meri fokus ngagai pemanah rampa menua ari teknologi enggau iniasitif gadung baka kuasa ulih dikemaru nyengkaum pengawa ngintu rampa menua ti seriris ngagai ubah tuju dunya kemaya hari,” ku iya.
Abang Johari bejaku munyi nya rambau Pengerami Anugerah IBR Borneo 2023 ba sebuah hotel tebilang ditu, malam tadi.
Nya alai, iya ti mega Menteri Kuasa Enggau Pemeruan Rampa Menua madahka pansik ti meruan patut terus dirandang dalam ngelala tauka ngiga pekara ti bedau ditemu agi.
