KUCHING: Perintah Sarawak udah ngemendar agih belanja sepenyampau RM71 juta dikena numbuhka Tegas Digital Co-Living Nomad Lodge sepiak genturung pendiau digital ba Taman Teknologi Tinggi Sama Jaya ditu.
Premier Sarawak, Datuk Patinggi Tan Sri Abang Johari Tun Openg madah, naka diatu, begunan nya benung digaga lalu disadang tembu ba timpuh 36 bulan.
Iya madah, fasiliti nya ditengkebang khas ungkup bala pemansik enggau nembiak ti benung bejalaika pengawa mansik ba Genturung Pendiau Digital Tegas sereta nyendia palan diau enggau palan belelak.
“Fasiliti tu endang keterubah ditumbuh ba Borneo lalu disikap ngena semua fasiliti ti diguna raban pemansik nya.
“Pia mega, fasiliti tu deka disikap ngena gim ungkup raban pemansik enggau nembiak sereta ngembuan studio mit dikena sida bejalaika seni, kreativiti enggau drama,” ku iya.
Abang Johari mansutka jaku nya rambau dirandau pemberita pengudah bejadi Eksibisyen Karier enggau Latih Sarawak (SCaT Fair) 2023 ditu, sehari tu.
Ngelansa silik, ku iya, genturung pendiau digital udah nempa mayuh anak Sarawak ti ngasilka aplikasyen pintar.
Iya madah, entara aplikasyen ti mujur diasilka sida baka sistem lampu isyarat pintar ngena teknologi Transit Signal Priority (TSP) ungkup Transit Aliran Automasi (ART) Sarawak.
“Sistem ditengkebang khas tu sebengkah sistem keterubah ditumbuh ba rantau Asia Tenggara.
“Nya alai, ditu kitai ulih meda bala anak kitai ngembuan penau tang sida begunaka palan ti ulih mantu sida bejalaika mayuh pansik.
“Co-Living Lodge tu deka nyendia sida ruang enggau fasiliti ti diguna,” ku iya.
