Perintah Pakatan Harapan ngasaka ati – Lo

KUCHING: Perintah Pakatan Harapan (PH) anang ‘Baka kepayang ngadaka dilah’, ku Kaban Kaunsil Nengeri (ADUN) Batu Kitang Lo Khere Chiang.

Lo madah iya chukup asa enggau ulah PH ti narit pulai agih RM 1.8 juta ke patut dikena ngaga pemansang ba genturung pendiau.

“Penyampau agih nya patut diberi dikena ngaga Dewan Haji Baki ke beungkus RM 1 juta sereta palan bedaja enggau beungkus RM 800, 000.

“Sida (Pakatan Harapan) mega kala madah, enti nadai Sarawak, nadai meh Malaysia,” ku Lo.

Iya madah nya lebuh pengawa bejadika Program Begulai enggau Rayat diatur Raban Indu enggau Nembiak SUPP di Kampung Haji Baki, kemari.

BEGULAI… Lo begulai enggau rayat ba Kampung Haji Baki ba Program Begulai enggau Rayat dipejalaika sida Indu enggau Nembiak SUPP di Kampung Haji Baki.- Gambar Alif Noni

Kelimpah ari nya, Lo madah mayuh agih belanja udah diberi perintah nengeri ngagai Kampung Haji Baki.

“Agih belanja nya enda kurang ari RM 1.5 juta udah dikena ngaga projek Transformasyen Menua Pesisir (RTP) di Kampung Haji Baki.

“Penyampau agih nya dikena ngaga parit enggau jalai alun ba genturung pendiau tu,” ku iya.

“Enda kurang ari RM 100, 000 dikena ba projek mit menua pesisir lebih agi ba genturung pendiau Haji Baki ditu,” ku iya nambah.

“Tu siti ari asil sida pemesai ba genturung pendiau tu ti puh betemu enggau aku sereta minta bantu,” ku iya.

Mayuh aktiviti dipejalaika sekumbang dua ari program begulai enggau rayat nya, entara nya pekit karaoke, pekit nyumai lalu bisi kaunter ngerejister diri nyadi pengundi dikemujur pengari Komiti Pengawa Bepilih Besai (SPR) sereta kaunter beperesa pengerai dibuka staf Klinik Pengerai Kota Sentosa.

Suara Sarawak