Perintah S’wak siru, ibuhka peminta rayat

KUCHING: Perintah Nengeri udah ngemendarka agih belanja penyampau RM9.076 bilion ungkup pemansang rayat di baruh Bajet Nengeri 2019.

Ku Tuai Pemegai Menua (TYT) Tun Abdul Taib Mahmud, Kepala Menteri chukup siruka peminta rayat kelebih agi di kandang menua pesisir.

“Bemacham projek besai enggau beratka pengelantang rayat udah dikemendar dikena nangkup peminta rayat renggat baruh.

“Tu nyengkaum bejalaika Projek Mit Pemansang Menua Pesisir (MRP) enggau Projek Rayat ti meri pemerat ba pengawa nyendiaka infrastruktur, utiliti enggau komunikasyen di kandang menua diselinting,” ku iya nerang silik.

Iya mansutka jaku nya beserimbai enggau pengawa bejadika Pengawa Beradat Aum Keterubah Penggal Keempat Aum Kunsil Nengeri (Dun) Sarawak Ke-18 di Dun ditu tadi.

BASA…TYT Sarawak Tun Abdul Taib Mahmud bejalai meresa baris raban pengelikun beserimbai enggau Pengawa Beradat Bejadika Aum Kunsil Nengeri Ke-18 Renggat Keempat ba Begunan Dun, disempulang Kepala Menteri Abang Johari enggau bala pemesai bukai ditu tadi.-Gambar Ramidi Subari

Nangkan nya ku iya, tu agih belanja pemansang pemadu tinggi dalam sejarah nengeri kitai di baruh pegai Abang Johari ti ibuhka peminta rayat.

“Ari penyampau belanja pemansang tu nyata ngayanka pengeran perintah nengeri ngerumban pemansang sereta ngangkatka tikas pengidup rayat di menua pesisir.”

Iya mega madahka diri bisi amat pengandal kesemua projek pemansang tu deka dipejalai nitika standard lalu tembu dalam timpuh ditetap pulaika pemaik rayat.

“Aku andal amat projek diperambu Kepala Menteri mutarka isu sekula repuk di menua pesisir deka mujur.

“Pengawa tu nyengkaum nyeleti enggau ngentak baru begunan sekula kelimpah disikap ngena perengka guna pemun ti patut nentuka bala nembiak enggau pengajar sereta bala staf lantang enggau likun ngatur pengawa sida,” ku iya.

Suara Sarawak