BINTULU: Pesaka budaya raban bansa Kayan bisi pengulih besai diangkat nyadi penyungkak pemansang ekonomi, lebih agi ba sektor dagang temuai enggau ekonomi kreatif di Sarawak.
Menteri Dagang Temuai, Seni enggau Budaya Malaysia, Datuk Seri Tiong King Sing madah, pengaya budaya dikembuan raban bansa Kayan nyadi reta berega ti patut dijaga enggau dikena manah ungkup pemansang komuniti sereta ekonomi nengeri tumbuh.
Ku iya, identiti budaya ukai semina nganyanka penatai raban bansa nya aja, tang ulih nyadi pengering ti meri asil ngagai pemansang sosioekonomi ba jeman moden.
“Pesaka budaya raban bansa Kayan nyadi keresa ti chukup berega.
“Iya ukai semina patut dijaga aja, tang patut diangkat nyadi penyungkak pemansang ekonomi kelebih agi ba sektor dagang temuai enggau ekonomi kreatif.
“Ba dunya ke majak moden enggau mayuh pemar tu, identiti budaya nyadi pengering ti chukup berega,” ku iya.
King Sing nibar ke jaku nya nengah teks jaku dibacha Pegawai Khas iya, Steven Kong Kai Seng rambau Pengerami Makai Lemai Pengerami Do Ledoh Serakup Kayan Sarawak (PKS) Pampang Bintulu 2026, Hari Enam tu tadi.
Iya madah, pangku pengawa gerempung komuniti baka Serakup Kayan Sarawak beguna endar nentuka pesaka budaya majak dijaga, dikerembai enggau disulur ngagai rebak dudi.
Ku iya, pengawa nyaga pesaka budaya patut diadu seriris enggau pemansang nengeri ngambi identiti enggau pengawa asal raban bansa enda lenyau diserunyut arus pemansang ke deras.
Iya mega nyemetak madah, pengawa ngelati budaya ulih ngerandang peluang baru ba industri dagang temuai bepelasarka komuniti, kelimpah meransang ekonomi kreatif tumbuh ke majak nerima perati ba renggat global. – EDISI UKAS
