MIRI: Pengawa bekenaka pemintar digaga (AI) ba bidang perubat ulih mai pesakit ba Sarawak betemu enggau pakar perubat di Shanghai ngеnа sistem ‘luture online’ dudi hari.
Premier Sarawak, Datuk Patinggi Tan Sri Abang Johari Tun Openg madahka chara tu ngaul interface digital ti ngasuh penguna ulih berandau enggau lutur nyengkaum pakar ti bepalan ba Shanghai.
Iya madah, sistem nya mega ngempung data pesakit ngagai siti pelasar dikena mantu dalam analisis enggau tisih perubat, ke alai nya ngasuh pesakit enggau pakar perubat muntang bekunsi penerang.
Abang Johari nerang, nengah chara tu, sistem nya ulih mantu ngasilka diagnosis bepelasarka data ke bisi, sebedau asil analisis nya ditukuka lutur.
“Data digempung ba siti pelasar. Sistem nya ngaga diagnosis, lalu lutur ti deka ngenukuka nya,” ku iya.
Iya nibarka jaku nya lebih bejadika Palan Konvensyen enggau Pemandang Kenyalang One sereta pengawa pecah tanah Taman Tema Ai Borneo Adventure ditu, kemari.
Abang Johari nerangka agi, teknologi lutur maya ti dipejalaika nya tau ngasuh kitai baka bejaku enggau lutur nya empu, laban sistem nya ulih ngaga replika gamal mua enggau sada nyawa lutur.
Iya meri chunto baka ni teknologi tu ulih ngemendarka siku individu beinteraksyen enggau pakar perubat ba Shanghai, ngеnа interface digital ti sebaka enggau lutur ke amat.
Ku iya nambah, teknologi nya mega ulih dikena ngerapitka pengelandik perubat ba endur ke bedia, enggau data pesakit ke udah sedia dikena mantu pakar ngaga tisih.
Abang Johari mega bisi ngenang pasal ngеnа AI, AI kuantum, enggau robotik ba pemansang industri dudi hari, nyengkaum penau ngatur data ke jampat agi dipejalai ketegal pemansang dalam chip semikonduktor.
Taja pia, Abang Johari nyemetak madahka teknologi AI enda ulih diseb ut sekа engau penemu mensia, laban lutur ke bendar ngembuan peneleba enggau penemu ke ditarak nengah pengawa sida.
Iya berati, taja teknologi engka ulih nyaru gamal tauka sada nyawa lutur, tang ukai reti sistem nya ngembuan penemu tauka peneleba baka mensia.



