LAWAS: Sarawak merambu ngerembaika sambung grid kuasa karan ke Brunei Darussalam dikena mekal kuasa ngagai menua sepiak nya, lalu negut kaul kerejasama serantau ba sektor kuasa.
Premier Sarawak, Datuk Patinggi Tan Sri Abang Johari Tun Openg madahka langgur nya berindik ari pemujur nyambung Lawas enggau grid kuasa karan besai Sarawak ti diatu nentuka pelilih nya ngasai bekal kuasa karan 24 jam lalu enda bepanggai ngagai injin api baka sebedau tu.
Ku iya, Sarawak bisi pengelebih bekunsi pemansut kuasa enggau menua sepiak, nyengkaum Sabah ti diatu nerima bekal kuasa karan nengah sambung grid nengeri.
“Kitai mega deka bekunsi bekal kuasa karan enggau Brunei nengah sambung grid. Kitai udah mekal kuasa karan ke Sabah.
“Kapasiti kuasa ti dikembuan kitai ukai semina ungkup dikena diri empu aja, tang mega dikunsi ngagai bakih kitai,” ku iya ba Pengerami Bejadi Palan Administrasyen Perintah Sarawak Lawas, ditu kemari.
Sebedau tu, Sarawak nyelinting nyain terma ungkup projek sambung grid kuasa karan enggau Brunei ujung taun tu nyadi sebagi ari inisiatif ngerembai dagang kuasa serantau.
Langgur nya nipak inisiatif ngemansang Grid Kuasa Borneo ti nyambung sistem bekal kuasa karan Sarawak enggau kandang menua sepiak dikena nyukung pengawa bekunsi kuasa enggau pemansang ekonomi.
Ngenang silik, Abang Johari madahka kaul rat entara Sarawak enggau Brunei Darussalam mega ngemuntang pengawa mutar bemacham isu nengah randau ti dipejalai ngena semangat bebakih.
“Aku deka meri besai terima kasih ngagai Sultan Brunei ti mayuh nyaup kitai ba randau entara Malaysia enggau Brunei nyengkaum ti ngaul Datuk Amar Awang Tengah Ali Hasan enggau aku empu
. “Kitai ulih mutar bemacham isu nengah semangat bebakih entara Brunei enggau Sarawak,” ku iya.
Iya mega madahka pemanah kaul nya narit perati Menteri Besai, Datuk Seri Anwar Ibrahim ti kala betanya baka ni bemacham pekara entara kededua raban nya ulih diputar manah.
“Kaul bepelasarka semangat kerejasama enggau bebakih nentuka kededua raban ulih mutar isu ke pemaik begulai.
“Kebuah pia laban Brunei enggau Sarawak baka siti ruang bilik.
Asil ari kaul tu deka nguntungka kededua raban,” ku iya nyemetak.
Iya ngarapka kaul nya majak ngerandang peluang pemansang besai agi ngagai Lawas, Limbang, Miri enggau Brunei, kelebih agi nengah nambah rentayan penyambung, bekal kuasa enggau aktiviti ekonomi ngilah adan menua.
Nangkan nya, ku iya, Perintah Sarawak mega meri perati ngagai pengawa nambahka bekal ai di Lawas nengah ngaduka tangki ai beresi ngambi tetangkupka peminta peranak.
“Nengah pemisi bekal ai, kuasa karan enggau palan administrasyen perintah, kitai ngarapka Lawas deka terus maju enggau mansang deras agi,” ku iya.
Iya nyemetak madahka pemansang infrastruktur enggau meri servis perintah meseti meri pemaik ngagai serap komuniti nadai ngira tirai juru, nipak inisiatif ngubah tikas idup peranak di kandang menua utara Sarawak.



