ARTIKEL

Ngedut kaul bala tuai indu

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: South Asian International Women’s Assembly (SIWA 2026) ke diatur nyadi pelasar besai ngedutka kaul bala tuai indu sereta ngerandang peluang kerejasama ngilah entara menua ba bidang ekonomi, dagang enggau pemansang komuniti.

Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah madah, gempuru besai nya ngayanka pengeransing begulai ngemansangka bala tuai indu, ngerembaika rentayan strategik sereta numbuhka mayuh agi peluang ngagai indu gawa ke pemansang komuniti.

Ku iya, pemujur SIWA ngatur gempuru antarabansa nya ngemegahka ati laban organisasyen nya ngarika komuniti minoriti ke relatif mit di Sarawak, tang mujur mutar mayuh pemar dikena ngemujurka pengawa nya.

“Pemesai siti-siti organisasyen tauka penyampau tubuh peranak ke diari enda patut nentuka ni penyauh pemujur deka dijapai,” ku iya lebuh bejaku ngarika Premier Sarawak, Datuk Patinggi Tan Sri Abang Johari Tun Openg lebuh Pengerami Bejadika SIWA 2026, ditu kemari.

Iya madah baru, pengawa negapka raban indu patut disukung enggau peluang nyata ba bidang ekonomi, dagang, pemansang profesional sereta diambi mangku pengawa nyadi tuai enggau ngaga pemutus.

Ku iya, Sarawak majak ransing nyendiaka akses sebaka ngagai indu ba bidang pelajar, pekara wang, teknologi digital enggau pemansang profesional seriris enggau agenda pemansang inklusif enggau meruan nengah Pelin Pemansang Pemgudah COVID-19 (PCDS) 2030.

Berebak enggau nya, iya madahka SIWA bela bejalaika pangku pengawa besai ngintu pesaka indu India di Sarawak ari ngeluarka bup mija kupi Sarawak Indian Women Heritage ke dilanchar ex- Tuai Pemegai Menua (TYT) Sarawak, niang Tun Pehin Sri Abdul Taib Mahmud kena 16 Oktober 2017.

Nya alai, iya ngarapka SIWA ulih ngeluarka siti da bup dikena ngadu dokumentasyen pengerembai, pemujur enggau jasa indu India di Sarawak ba jeman pengudah merdeka ngambi sejarah enggau jasa sida diaku enggau disulur ngagai rebak dudi.

Iya bela muji pengeransing komiti pengatur ke udah kiruh ngemujurka gempuru nya taja napi mayuh pemar, nyengkaum penanggul geopolitik enggau penyarut antarabansa ke ngeruga pejalai sereta penatai delegit, kelimpah penekul logistik enggau belanja.

Iya mega ngarapka gempuru nya ulih nempa kerejasama besai reti ba bidang dagang, embing, besilih penemu enggau kerejasama institusyen, kelimpah mantaika asil randau ngagai inisiatif praktikal ke meri pemaik ngagai indu enggau komuniti.

SIWA 2026 ngena sulu jaku Empowering Women, Transforming Societies: Building a Stronger South Asia Diaspora ngempuruka bala tuai indu, raban profesional, raban akademik enggau raban gerempung komuniti ari Asia Selatan sereta komuniti antarabansa ngambi sama ngedutka kaul enggau kerejasama ba agenda negap indu.

Sama datai, Pesuruhjaya Tinggi India ke Malaysia, H.E. Somnath Ghosh; Chairperson SIWA 2026 Profesor Veena Sikri, Presiden Sarawak Indian Women Association (SIWA) ke mega Chairperson Pengatur SIWA 2026, Penghulu Paliani Samba Bilaidom @ Lucy Lingam; Direktor Opis Indu enggau Ruang Bilik Sarawak, Sharifah Zakiah Tuanku Pauzi. – EDISI UKAS

BERITA LAIN

Sejuta rakyat Malaysia alami kemurungan – Fatimah

KUCHING: Kesejahteraan mental perlu diberi perhatian sebagai asas kepada pembentukan keluarga yang kukuh dan komuniti berdaya tahan, khususnya ketika masyarakat berdepan perubahan pesat teknologi serta

BERITA TERBARU

Grid kuasa karan ke Brunei Darussalam

LAWAS: Sarawak merambu ngerembaika sambung grid kuasa karan ke Brunei Darussalam dikena mekal kuasa ngagai menua sepiak nya, lalu negut kaul kerejasama serantau ba sektor

Pakaian lama masih bernilai

SETIAP hari, khususnya pada hujung minggu, pusat beli-belah di sekitar bandar raya ini dipenuhi pelbagai pelanggan. Ada pelanggan dari luar Kuching, malah ada juga yang