PH enda bebasaka sempekat

MIRI: Komiti Pengatur Komuniti Genturung Pendiau (MPKK) semina deka ngasuh rayat rumah panjai enggau genturung pendiau menua pesisir charut.

Ku Sapit Kepala Menteri Datuk Amar Douglas Uggah Embas, perambu Perintah Pakatan Harapan (PH) numbuhka komiti nya deka ngeruga kaul rayat renggat baruh.

“Nya kebuah Gempung Parti Sarawak (GPS) netapka penemu nulak perambu nya dipejalai ba menua tu.

“Niat sida ukai deka ngempung enggau gawaka pengelantang rayat tang semina deka beambi ulih ba politik aja, nyengala deka ngerampas Sarawak ari pegai GPS,” ku Uggah madah nyemetak.

Tambah mega, pekara tu jauh limpang ari pekara ti udah disetuju Perintah PH lebuh ngemendarka Sarawak ngemeranka JKKK pengudah Pengawa Bepilih Besai Ke-14 (PRU14) suba.

“Lebuh nya, sida udah setuju kitai Sarawak deka ngena JKKK baka selama, bebida enggau nengeri bukai ti nyilih JKKK enggau MPKK pengudah perintah besai berubah.

“Penemu dipansut sida diatu balat ngasuh ati kitai nyima laban baka enda bebasaka sempekat ti udah ditanggam,” terang iya.

Uggah mansutka jaku tu rambau Program Randau Beserimbai Enggau Pengerami Pemesai Begulai Enggau Rayat ba Kampung Long Jeeh, Baram ditu tadi.