Piak GPS nadai nagang menteri PH ari Semenanjung berami ba rumah panjai

“Enti sida (tuai rumah) enda nerima, nya endang ari pemutus jaku komiti rumah panjai nya empu.”

KUCHING: Bala ketuai tauka piak Gabungan Parti Sarawak (GPS) nadai kala nagang menteri Pakatan Harapan (PH) ari menua Semenanjung nemuai ngagai rumah panjai ba menua tu.

Kaban Parlimen Batang Sadong, Datuk Seri Nancy Shukri madah iya nadai kala ngasuh sida tuai rumah ba sitak dipegai iya nagang bala menteri PH nemuai berami Gawai ba rumah panjai sida.

“Aku nadai kala bisi runding tauka pemutus madah sida tuai rumah enda tau nerima temuai datai berami ngagai rumah panjai sida maya pengerami Gawai.

“Enti sida (tuai rumah) enda nerima, nya endang ari pemutus jaku komiti rumah panjai nya empu,” ku iya.

ANANG SENGAPA TUDUH… Nancy (tengah) enggau Tuai Rumah Sili Bunsi (duduk dua ari kanan), Sungai Buluh nunjukka lambar surat ti mandangka jaku Joseph Tawie ba dalam laman Facebook apin lama.

Nancy madah munyi nya rambau pengarang berita di Indu Opis Parti Pesaka Bumiputera Bersatu (PBB) ditu, kemari.

Nangkan nya, iya madahka kena 10 Mei tu tadi, siku ex-pemberita, Joseph Tawie bisi mansutka jaku ba Facebook nyebut Nancy udah ngasuh tuai rumah ari Sungai Bulu (Buluh), Batang Sadong nginsil sereta enda nerima penemuai Menteri Komunikasyen enggau Multimedia Malaysia, Gobind Singh Deo ngagai rumah panjai sida.

“Aku nadai kala ngasuh Tuai Rumah Sili Bunsi nginsil penemuai nya.

“Sida komiti rumah panjai tu empu bisi hak tauka buah runding sida empu nama kebuah sida enda nerima penemuai nya,” ku iya.

Ku Nancy, iya nadai nemu pekara nya udah dikinsil, lalu pengudah Tuai Rumah Sili Bunsi ari Sungai Bulu (Buluh) nginsil pengawa nya, baru iya madahka pekara ke enda nyadi nya ngagai Nancy.

Kelimpah ari nya, jaku ke dipansutka Joseph Tawie ba facebook nya enda patut laban udah ngamahka nama Kaban Parlimen Batang Sadong nya.

“Naka tu, aku nadai ngaga ripot polis laban aku enggai bisi laya ketegal ari pekara tu.

“Aku madahka pekara tu ngagai pengarang berita laban deka meri timbal ngagai Joseph Tawie, pekara nya nadai kaul enggau kami GPS lalu kami nadai kala takutka sida PH,” ku iya.

Apin lama ti udah, Joseph Tawie mansutka jaku iya ba Facebook madahka “Nama kebuah orang ukai bansa Dayak madah ngagai tuai rumah sapa orang ke patut nemuai lalu sapa ke enda patut nemuai ngagai rumah panjai sida maya pengerami Hari Gawai?”

Dalam jaku nya mega, iya madahka sida GPS bemain politik enggau pengerami Gawai Dayak.

Suara Sarawak