PKPB di Sarawak deka diperunding dulu

KUCHING: Chairman Komiti Penyangga Penusah Ngenyit Nengeri (JPBN) deka berandau enggau Kepala Menteri Datuk Patinggi Abang Johari Tun Openg ngambi bejalaika Atur Tagang Pejalai Besyarat (PKPB) ba Sarawak.

Datuk Amar Douglas Uggah Embas madah, randau nya deka diatur berindik ari pekara dipadahka Menteri Besai Tan Sri Muhyiddin Yasin pasal PKPB ba penerang khas beserimbai enggau Hari Pengereja Pengawa kena Hari Lima tu tadi.

Menteri Besai madahka nyauka semua aktiviti ekonomi enggau dagang dikemendar beoperasyen berengkah pagila tang meseti nitihka syarat sereta prosedur operasyen standard (SOP) ti terit.

Taja pia, sekeda industri enggau pengawa dagang ti begunaka pengereja begempuru sereta betegu enggau pangan diri lalu atur nyaga takah enda ulih dipejalai nya agi enda dikemendar beoperasyen.

Nya kebuah, Uggah udah telefon ngagai Sekretari Kepala Menteri ngambi netapka haribulan.

“Kitai meseti berundingka PKPB tu ungkup pengelantang komuniti enggau ekonomi menua sebedau ngaga sebarang pemutus.

“Aku meseti berandauka pekara tu enggau Kepala Menteri dulu,” terang Uggah.

Uggah mansutka jaku nya ngagai pemberita pengudah ngambat penatai 287 nembiak Sarawak ari Semenanjung Malaysia ba Padang Bilun Entarabansa Kuching (LTAK) ditu.