PKPB : Semina 50 iku aja ulih betugung maya rabat

KUCHING: Komiti Penyangga Penusah Nengeri Sarawak (JPBNS) sehari tu ngaga pemutus bekaul Atur Pengawa Standard (SOP) ngesah pengawa rabat.
Chairman iya, Datuk Amar Douglas Uggah Embas madahka ba menua ke diteritka Atur Mindah Betagang Belebas (PKPB), semina 50 iku aja dikemendar betugung maya bisi ngesah penusah rabat lalu 30 iku aja dikemendar ngusung pendam.
“Ba endur diteritka Atur Mindah Betagang (PKP), semina diri sebilik aja dikemendar ngagai pendam lalu SOP ngesah penusah rabat ulih dipeda ari Unit Pekara Pengarap Bukai (Unifor) enggau Opis Pengarap Islam Sarawak (Jais).
“Semua pejalai tama enggau pansut ari zon gadung deka diteritka PDRM lalu semua pengerami enggau aktiviti begempuru enda dikemendar ba genturung pendiau enggau rumah panjai,” ku iya.
Sarawak mega ngerikod dua kes pemati iya nya bela siti ba Sibu enggau Miri ngujungka penyampau semua kes pemati diatu bisi 24 kes.
Uggah madahka kes pemati ke-23 nya kes ke 2,775 ngaul siku lelaki peranak menua beumur 48 taun.
Ku iya, lelaki nya dipasuk ngagai Sepital Miri kena 19 Januari tu tadi laban pedis enseput ketegal kelalu mayuh ai dalam tubuh laban penyakit buah punggung.
Ku Uggah, iya ditemu positif Covid-19 kena 21 Januari tu tadi enggau bebadi nyawa pukul 2.04 pagi 21 Januari tu tadi kelimpah bisi penyakit bukai baka kemi manis, tinggi darah enggau dislipdemia.
“Kes pemati ke-24 nya kes ke-2,182 ngaul siku lelaki peranak menua beumur 66 taun ti dipasuk ba Sepital Sibu kena 17 Januari tu tadi laban pedis enseput.
“Iya ditemu positif Covid-19 ba hari ti sama iya beperesa iya nya kena 17 Januari tu tadi enggau bebadi nyawa pukul 3.11 pagi, 22 Januari tu tadi.
“Lelaki nya kes ari Kluster Pasai lalu bisi penyakit bukai baka kemi manis, tinggi darah enggau ampus,” terang Uggah.
Sarawak ngerikod 229 kes baru positif Covid-19 iya nya di Sibu bisi 168 kes, Miri (28), Kuching (9), Kanowit (7), Sri
Aman (7), Lubok Antu (7) , Subis (2) enggau Bintulu (1) ngujungka penyampau semua kes diatu nambah ngagai 2,931 kes.
Naka tu, lapan kluster agi ngerekai baka Kluster Rakut di Miri, Kluster Bukit Sekubong di Sebauh, Kluster Jelita di Miri, Kluster Pasai di Sibu, Kluster Keranji Tabuan di Kuching, Kluster Bah Sayap di Miri, Kluster Stutong di Kuching, Kluster Mador di Meradong.
“Bisi 141 kes udah suman enggau dikemendar pansut ari sepital iya nya 68 kes di Sepital Sibu, Sepital Miri (45),
Sepital Besai Sarawak (23) enggau Sepital Bintulu (5) ngujungka kes udah suman nambah 1,469 iku tauka 50.12 peratus.
“Bisi 1,442 iku agi diperubat ba wad isolasyen iya nya 999 iku di Sepital Sibu, 238 iku di Sepital Miri, 133 iku di Sepital Besai Sarawak (SGH0, 71 iku di Sepital Bintulu enggau siku di Sepital Limbang.
“Bisi empat iku begunaka kereban kena enseput iya nya tiga iku di Sepital Sibu enggau siku di SGH sereta 93 PUI baru dirikodka enggau 57 PUI agi nganti pemutus peresa makmal,” terang Uggah.